22-cü dünya çempionatının başa çatmasına cəmi bir gün qalıb.

Bir neçə saatdan sonra mudialın qalibinin adına aydınlıq gələcək. Qətərdə təşkil olunan futbol bayramında dünyanın dördbir yanından qonaqları, azarkeşləri görmək mümkündü ki, bu yöndə həmyerlilərimiz də istisna olmadı. Dohaya üz tutanlardan biri də Şaiq Qəribzadədi. Futbol camiəsi onu yaxşı tanıyır. Tanımayanlara xatırladaq ki, Şaiq bəy Azərbaycan teleməkanından yaxşı tanıdıqları, “21-ci əsrin səyyahı” deyə biləcəyimiz Azər Qəribin oğludu.

Dünən baş tutan söhbətimizdə ondan Qətər təəssüratını bölüşməsini istədik.

- Bildiyim qədər bu, sizin yollandığınız ilk mundial deyildi.
- Bəli, Qətərdə keçirilən dünya çempionatı getdiyim dördüncü mundial idi. Bundan əvvəl 2006-cı ildə Almaniyada, 2014-də Braziliyada və 4 il öncə Rusiyada təşkil olunan analoji yarışlarda azarkeş qismində iştirak etmişəm. Çalışıram mundialları buraxmayım. Ancaq 2010-cü ildə dünya çempionatı Cənubi Afrikada keçirildiyindən və ora bir qədər uzaq olduğundan işlərimlə bağlı gedə bilmədim. Dünya çempionatları ilə yanaşı, Avropa çempionatlarında da olmuşam. 2000-ci ildə Belçika və Niderlandda təşkil olunan qitə çempionatı ilə yanaşı, 2012-də Ukrayna və Polşanın birgə təşkil etdiyi turnirə də yollanmışam. Ötən il ölkəmizdə keçirilən turniri də nəzərə alsaq, bu günə kimi 3 Avropa çempionatında tribunada olmuşam. Əmim biraylıq Qətərə getmişdi və bütün qrup oyunlarına bilet almışdı. Sözün düzü, planımda Qətərə yollanmaq yox idi. Ancaq əmim dəvət etdi və səfərə çıxdım.

- Qərb mətbuatı ilk dəfə bir müsəlman ölkəsində təşkil olunan dünya çempionatı barədə heç də birmənalı fikirdə deyil. Siz təşkilatçılıq barədə nə deyə bilərsiz? Nəyi bəyəndiz, nə xoşunuza gəlmədi?
- Təbii ki, oyunları stadiondan canlı izləmək tam fərqlidi. Bunun mənfi və müsbət tərəfləri var. Televiziya qarşısında əyləşəndə oyunla bağlı daha çox məlumat əldə edirsən, şərhçilərin fikirlərini eşidirsən. Ancaq fərqli ölkələrdən gələn azarkeşlərlə matç izləməyin öz ləzzəti var. Bu tam fərqli hissdi. Mundialdan öncə mediada azarkeş olmayacağı ilə bağlı təbliğat gedirdi. Yazırdılar ki, xaricdən pulla azarkeşlər dəvət ediblər. Əslində isə orda fərqli mənzərənin şahidi oldum. 4 günə 5 qarşılaşmanı canlı izlədim. Getdiyim oyunlarda tribunalarda, demək olar ki, boş yer qalmamışdı. Fərqli ölkələrdən Qətərə yetərincə azarkeş gəlmişdi. Düzdü, Avropdan gələnlərin sayı az idi. Əvəzində başqa qitələrdən gələn tərəfdarların sayı çox idi. Ümumi ab-hava yaxşı idi. Təbii ki, yenə o fikirdəyəm ki, dünya çempionatı kimi mötəbər turnir futbol ölkələrində keçirilməlidi. Futbol bayramının ab-havası stadionlarla yanaşı, mundialın keçirildiyi şəhərlərdə də hiss olunmalıdı. Həmin şəhər ab-havası, təəssüf ki, Dohada hiss olunmurdu. Stadiondan çıxandan sonra sakit bir şəhərə qayıdırdın.

- Orda olduğunuz müddətdə tanınmışlardan, dünya ulduzlarından kimlərəsə rast gəldiz?
- Əvvəlkilərdən fərqli budəfəki dünya çempionatında belə bir şey olmadı. 2006-cı ildə Almaniyada keçirilən mundilda Jak Şirakı, Roje Millanı, Arsen Vengeri, Mişel Platinini, Braziliya-2014-də Dunqanı, Rusiyada bəzi tanınmış rus futbolçuları görmüşdüm. Bu dəfə, təəssüf ki, heç kimi görə bilmədim.

- Qətərdəki turnirdə 200-ə yaxın həmvətənimiz müxtəlif təşkilati işlərdə çalışırlar. Onlarla görüşə bildiz?
- Qətərdə təşkil olunan turnirə xeyli həmyerlimizin cəlb olunduğunu mətbuatdan oxumuşdum. Orda olduğum müddətdə yalnız bir nəfərlə görüşə bildim. Dosum Rüfət Həsənov 80 min fanatın qalması üçün nəzərdə tutulan məkanın logistik meneceridi. Onunla söhbət zamanı bildirdi ki, təşkilat komitəsi çox sayda azərbaycanlının xidmətindən yararlanır.

- 32 ölkədən olan azarkeşlər həm də fərqli ölkələrin futbol mədəniyyəti ilə tanış olmaq deməkdi. Ən çox hansı yığmanın azarkeşlərini bəyəndiz?
- Stadionda və ətrafında çox maraqlı mənzərə ilə qarşılaşırdıq. Ən çox bəyəndiyim Kamerun və Seneqal azarkeşləri oldu. Demək olar, 90 dəqiqə dayanmadan komandalarını dəstəkləyirdilər, tribunada rəqs edirdilər. Çox maraqlı libasları var idi. Ən çox azarkeş isə gördüyüm qədər Ekvadordan gəlmişdi.

- Sonda finalla bağlı proqnozunu bilmək istərdik.
- Fransa daha gözəl futbol oynayır və çempion olmağa daha layiqdi. Ancaq belə düşünürəm ki, Messi Argentinanı dünya çempionu edəcək.

RƏŞAD