FİFA yeni turnir təsis etdi
Canni İnfantino dünən Qətərin Doha şəhərində mətbuat konfransı keçirib.
Football-plus.az xəbər verir ki, FİFA-nın prezidenti bir sıra məsələlərlə bağlı fikirlərini jurnalistlərə çatdırıb.
O, DÇ-2022-nin futbol tarixinin ən yaxşı mundialı olduğunu bildirib:
“FİFA Şurasının Qətərdə keçirilən dünya çempionatını yekdilliklə yüksək dəyərləndirdiyini qeyd etmək istərdim. Turnirdə təşkilatçılığın səviyyəsi çox yüksəkdi. Yaradılan unikal şəraitə görə, bu çempionatın tarixin ən yaxşı mundialı olmasında rolu olan hər kəsə təşəkkürümü bildirirəm. Futbol sülh və dostluq ruhunu birləşdirərək özünəməxsus kollektiv gücü yaratdı. Onu da qeyd edim ki, Səudiyyə Ərəbistanı, Hindistan, ABŞ, Meksika və Koreya Qətərə daha çox azarkeş göndərən ölkələrdi”.
İnfantino mundial ərəfəsində - noyabrın 4-də turnir iştirakçılarını futbolu siyasətə qatmamağa çağırmışdı. O, artıq arxada qalan müddətdə bu planda ortaya çıxan mənzərənin çox yaxşı olduğunu deyib:
“Biz insan hüquqlarını qoruyuruq. Eyni zamanda tribunalarda olan onminlərlə tamaşaçını və televizor arxasında olan milyardlarla futbolsevəri də nəzərə almalıyıq. Hər kəsin problemləri var. Amma heç kim matç zamanı futboldan kənar mövzuları xatırlamaq istəmir. Hər kəs futboldan həzz almaq, müxtəlif emosiyalar yaşamaq istəyir. Bizim vəzifəmiz ondan ibarətdi ki, futbolsevərlər oyuna tamaşa edərkən öz problemlərini unuda və yalnız futbol atmosferi ilə tənəffüs edə bilsinlər”.
İnfantino mətbuat konfransında növbəti mundialla bağlı fikirlər də səsləndirib.
Qeyd edək ki, DÇ-2026-nın final mərhələsində ilk dəfə 48 komanda iştirak edəcək. Son günlər ilk dəfə üç ölkədə (Kanada, ABŞ, Meksika) təşkil olunacaq turnirin formatında dəyişiklik edilə biləcəyi ehtimalı artıb. Buna təşkilatçı ölkələrin ilkin format layihəsi üzrə aparılan danışıqlarda ümumi razılığa gələ bilməməsi şərait yaradıb. FİFA-nın prezidenti 4 il əvvəl iştirakçıların hər birində 3 komanda olmaqla 16 qrupa bölünmə planının təsdiqləndiyini xatırladıb:
“Lakin bu formata yenidən baxıla bilər. Dörd komandadan ibarət 12 qrupun ən yaxşı seçim olacağına dair fikirlər də var. Görünür, bununla bağlı müzakirələr davam etdiriləcək. 2030-cu ilə təyin olunan dünya çempionatının harda keçiriləcəyinə isə 2024-cü ildə aydınlıq gələcək”.
FİFA-nın rəhbəri mətbuat konfransında maraqlı ideya ilə bağlı məlumat da verib. İnfantino müxtəlif futbol konfederasiyalarından dörd komandanın iştirak edəcəyi Dünya Seriyası adlı dostluq turnirinin təsis olunduğunu elan edib:
“Gələn ilin martına nəzərdə tutulan 10 günlük “pəncərə”də müxtəlif konfederasiyalardan dörd komandanın iştirakı ilə dostluq turnirini təşkil etmək qərarına gəlmişik. Məqsədimiz fərqli regionlardan olan yığmalar arasındakı matçların sayını artırmaqdı”.
Digər xəbərlər
