Qəzetimizin ötən sayında Qadınların Tennis Assosiyasiyasının 2022 mövsümü üçün müxtəlif nominasiyalar üzrə qalibləri müəyyənləşdirdiyini xəbər vermişdik.

Football-plus.az xəbər verir ki, Peşəkar Tennisçilər Assosiasiyası (ATP) isə kişi tennisçilər arasında qalibləri elan edib. “Böyük dəbilqə” turnirlərinin 22 qat qalibi Rafael Nadal karyerasında ilk dəfə “tennis həvəskarlarının sevimli oyunçusu” nominasiyasında qalib gəlib. 2000-ci ildən bəri bu nominasiya üzrə mükafat yalnız üç tennisçiyə - isveçrəli Rocer Federerə (ardıcıl 19 dəfə), rusiyalı Marat Safinə (iki dəfə) və braziliyalı Qustavo Kuertenə təqdim olunmuşdu. Azarkeşlər arasında ən çox sevilən cütlük üçün ayrılan mükafatın sahibləri avstraliyalılar Nik Kiryosla Tanasi Kokkinakisdi. Bu iki tennisçi başa çatmaqda olan ildə Avstraliya Açıq Tennis Çempionatında cütlərin yarışında qalib gəlib.

ATP Holger Runeni “ilin yeniliyi” kimi fərqləndirib. 19 yaşlı danimarkalı 2022 mövümündə dünya reytinqində 103-cü pillədən 11-ci pilləyə qədər irəliləyə bilib. O, mayda ATP səviyyəsində debüt etdiyi Münhen turnirində qalib gəlib, həmçinin “Rolan Qarros”da yarımfinala qədər irəliləyərək bu mərhələdə norveçli Kasper Ruuda uduzub, Stohkolm turnirində və Parisdə keçirilən “Masters” seriyalı turnirdə qalib olub.

Dünyanın 1 nömrəli kişi tennisçisi Karlos Alkarasın məşqçisi Xuan Karlos Ferrero “ilin məşqçisi” sayılıb. 42 yaşlı mütəxəssisin 2019-cu ildən bəri çalışdırdığı Alkaras məhz bu il dünyanın 1-ci tennisçisi olub və ili bu statusla da bitirib. 19 yaşlı ispaniyalı başa çatmaqda olan ildə 4 ATP turnirində və ABŞ Açıq Çempionatında qalib gəlib.