Belə getsə, FİFA-nın yeni layihəsi reallaşmayacaq.

Football-plus.az xəbər verir ki, söhbət Klublararası Dünya Çempionatının (KDÇ) 32 komandanın iştirakı ilə təşkilinin baş tutmamaq ehtimalının artmasından gedir.

Avropanın aparıcı klubları 2025-ci ildə ABŞ-da keçirilməsi planlaşdırılan KDÇ-nin yeni formatında iştirakdan imtina ediblər. İngiltərədə çıxan “Daily Mail” qəzetinin məlumatına görə, FİFA yeni layihə ilə bağlı bu ilin sonuna qədər klublarla razılığa gəlməyi planlaşdırıb. Funksionerlər Qətərdə keçirilən dünya çempionatı zamanı Avropanın bir sıra klublarının nümayəndələri ilə danışıqlar aparsalar da, ümumi razılaşma alınmayıb. 

“Daily Mail” FİFA rəhbərliyinin indi bu problemi necə yoluna qoyacağını bilmədiyini vurğulayıb. Çünki ali futbol qurumunun artıq məsələni həll etməyə vaxtı yoxdu. Startı 2025-ci ilə təyin olunan KDÇ-nin yeni formatı hələ razılaşdırılmayıb, təsnifat mərhələsinin təşkili qaydası müəyyən edilməyib. Həmçinin yeni turnir üçün televiziya şirkətləri və kommersiya tərəfdaşları ilə danışıqlara da start verilməyib.