Ferstappen çempion olduğu mövsümləri müqayisə etdi
“Red Bull”un pilotu Maks Ferstappen “Formula-1”də dünya çempionu olduğu 2021 və 2022 mövsümlərini müqayisə edib:
“Emosiyalar çox fərqlidi. Ancaq düşünürəm ki, bunlar istənilən halda olmalıdı. Ona görə ki, bütün həyatın boyunca konkret bir hədəfə - dünya çempionluğuna can atırsan. Bu il tam fərqli oldu. Həqiqətən də, düşünürəm ki, bu il daha rəqabətədavamlı olduq və komanda kimi çıxışımızdan məmnunluq duyduq. Həm fərdi hesabda, həm də Mühəndislər kubokunda qalib gəldik. Odu ki, builki qələbə daha faydalı idi. Ancaq ilk qələbə bundan da emosional alındı”.
Xatırldadaq ki, ötən cümə Bolonyada keçirilən xüsusi mərasimdə Beynəlxalq Avtomobil Federasiyası niderlandlı pilota 2022 mövsümündə qələbəyə görə kubok təqdim edib.
“Formula-1” dünyasından daha bir yeni xəbər budu ki, Niderland “Qran-pri”si ilə bağlı müqavilənin müddəti uzadılıb. Yeni müqavilədə bu ölkədə 2025-ci ilə qədər yarışların keçirilməsi nəzərdə tutulur. Niderland mərhələsi 1948-85-ci illər aralığında müntəzəm fasilələrlə “Formula-1” təqvimində olub və ötən il yenidən təqvimə qayıdıb. Son iki ildə Niderlandda keçirilən yarışların qalibi Maks Ferstappen olub. Gələnilki yarış avqustun 25-27-nə planlaşdırılıb.
Digər xəbərlər
