Misli premyer-liqanın 17-ci turunda "Kəpəz" - "Sabah"la heç-heçə edib - 2:2.

Football-plus.az xəbər verir ki, oyundan sonra keçirilən mətbuat konfransında Tərlan Əhmədov görüş haqda fikirlərini səsləndirib:

- Abdullahi Şuaybunu “oğurlamaq” istəyənlər var?
- Bayaq qulağıma çatdı ki, onunla maraqlanıblar. Bura gələndən nizam-intizama üstünlük veririk. Hərdən hansısa futoblçu olmayanda oyun planında çətinlik çəkirik. Şuaybu zədədən sonra geriləmişdi. Amma bu gün aqressiyası Azərbaycanda bir nömrədi. Qol da vurur, rəqibi təzyiqdə saxlayır. Gəncdi, 20 yaşlı futbolçunu “oğurlamaq” istəyənlər olacaq. Xəbər çatıb ki, onunla maraqlanan var.

- Əfran İsmayılovla aranızda nə baş verib?
- Arada heç bir münaqişə yoxdu. Söz azadlığı var, kim nə istəsə danışa bilər. Mən də buradayam. İşim meydançadadı.

- Rauf Əliyev, Elvin Yunuszadə, Əfran İsmayılov, Əli Səmədov kimi təcrübəliləri əsas komandadan uzaqlaşdırmısız. Bu, öz yerinizi möhkəmləndirməklə bağlıdır, yoxsa arxasında başqa səbəb dayanır?
- Arxasında heç nə dayanmır. Gəncə Azərbaycan futbolunun beşiyidi. Axırıncı dəfə hansı gəncəli əsas millidə, neçə il əvvəl oynayıb? Mahmud Qurbanovdan sonra kimsə olub? O da 10-12 ildir, futbolçu karyerasını bitirib. Komandada cavanlaşdırma siyasəti aparıram. Bacardığımız qədər gəncəli gəncləri komandaya cəlb etməyə çalışırıq. Bütün fikrimiz gənc nəsillə bağlıdı. Azərbaycanda yetərincə yaxşı cavan oyunçular var. Əsasən də U-21 millisinə namizədləri cəlb etməyə çalışırıq. Digərlərinin yolu açıq olsun. Gəncə futboluna, Azərbaycan futboluna yeni nəsil gəlməlidi. Kim nə istəyir, deyir, Allahı bilsin, özü bilsin. Mən gəldiyim gündən məqsəd qoyulub ki, komanda premyer-liqada qalsın. İdarə Heyətinin sədri İlqar Nadiriyə demişəm ki, bacardığm qədər xal toplayacam. Fikrimcə, 16-17 xal toplamalıydıq. Bəzi səbəblərə görə doğrulmadı. Komandam oynamağa başlayır. Qışda əcnəbilər cəlb olunacaq. Gedənlərin siyahısı bilinir. Rəhbərliyə bildirilib. Heç kimlə qərəzim yoxdu. Rəhbərliyə də demişəm ki, gəncləşmə siyasəti getməlidi ki, güclü rəqiblərlə mübarizə aparaq. Mənə qədər oyunçular cəlb edilib və komanda hansı vəziyyətdə olub, hamı bilir. Kim nə istəyir, yazır, deyir. Buyursunlar.

- O futbolçular mövsümdən əvvəl komandaya cəlb olunub. Həm əvvəlki baş məşqçi, həm də klub rəhbərliyinə qaşrı mübarizə aparırsız? Bundan qorxmursuz?
- Heç bir qorxu yoxdu. Yaşar Vahabzadə böyük qardaşımızdı. Bir yerdə futbol oynamışıq. Məşqçilik elədi ki, uğur olub-olmayacağını bilmirsən. O vaxt lazım olub, götürülüb. Mən də düşünürəm ki, daha uğurlu olmaq üçün bəzi oyunçularla yollar ayrılmalıdı. Əsas məsələ baş məşqçi və idarə heyəti yox, Gəncə futbolunun düzəlməsidi. Bu gün təməli düzgün qurmaq istəyirik, amm zərbələr olur. Deməli, hamımız yalandan istəmişik ki, bölgədə futbol olsun. Hər yerdə yeni baş məşqçi dəyişikliklər edir. Amma heç bir klubda bu qədər söz söhbət olmur. Rəhbərlik də mənim arxamdadı. Gəncə futbolu inkişaf etməlidi.

- Rəhbərliyin arxanızda olduğunu deyirsiz, amma komandadan uzaqlaşdırdıqlarınız hələ də göndərilməyib...
- Bu, mənim işim deyil. Rəhbərliyin işidi. Necə edəcəklərini onlar bilir. Dünyanın bir nömrəli futbolçusu “Mançester Yunayted”dən qovulursa, biz niyə inkişafımız üçün nəyisə ləngidək? Futbolun tələbi budu. Getməyəcəklərsə hansı mövqelərə oyunçu lazımdı, onlar cəlb olunmalıdı. İlqar Nadiri ilə danışdıq, müzakirələrimiz oldu. Dedik ki, artıq komandanı gücləndirməliyik. Vaxtımız da azdı.