“Türkiyədə açıqlamaq istəmədiyim səbəblərə görə şans qazanmadım”
“Hall Siti”nin iranlı forvardı Allahyar Səyyadmaneş Türkiyə mətbuatına diqqətçəkən açıqlamalar verib.
Football-plus.az xəbər verir ki, Acun Ilıcalının sahibi olduğu “Hall Siti” bugünlərdə Antalya toplanışını başa vuraraq vətəninə qayıtdı. 21 yaşlı Allahyar 2019-cu ildə “Fənərbaxça”ya transfer olunsa da, burda özünü göstərə bilməmişdi. Sonra icarə əsasında “Zarya” və “Hall Siti”də top qovan istedadlı futbolçu bu yay birdəfəlik ingilislərə satıldı. Allahyarı dinləyək:
“Antalya toplanışı çox faydalı keçdi. Zəif nöqtələrimizi müəyyənləşdirərək komanda şəklində üzərimizdə işlədik. Mən zədədən yeni qayıtdığım üçün fərdi şəkildə məşq etməli oldum. “Zarya” karyeram üçün bir dönüş anı oldu. Orda həqiqətən də yaxşı performans sərgilədim. Dərhal fərqli ölkələrdən təkliflər almağa başladım. “Hall Siti” də təklif göndərənlərdən biri idi. Öncə klub prezidenti ilə görüşdüm. Aramızda gözəl və səmimi bir ünsiyyət yarandı. Sonra da transferim reallaşdı. Mənim zatən İngiltərə futboluna həmişə böyük simpatiyam olub. Özümü burda çox yaxşı hiss edirəm. Fikrimcə, “Hall Siti”yə keçmək həm mənim, həm də klub üçün düzgün qərar oldu. Çempionşip maraqlı və çətin turnirdi. Çətinlikdən heç vaxt qaçmamışam. Əksinə, belə durumda üzərimdə daha çox çalışıram. Əslində mövsümə yaxşı başladıq. Amma 5-ci turdan sonra müəyyən problemlər baş qaldırdı və nəticələrimiz zəiflədi. DÇ ilə bağlı yaranmış fasilənin xeyrimizə olacağını düşünürəm. Çünki məşqçimiz yenidi və komandanın ona uyğunlaşmaq üçün əlavə zamanı var. Aşağı pillələrdə qərarlaşsaq da, mövsümün sonuna qədər hələ 25 oyunumuz var. Performansımızı yüksəldə bilsək, hədəflədiyimiz yerə qayıda bilərik. Türkiyədəki karyeram artıq geridə qalıb. Düzünü desəm, Türkiyəyə böyük həvəslə yollanmışdım. Oynaya və özümü göstərə biləcəyimi düşünürdüm. Amma indi açıqlamaq istəmədiyim bəzi səbəblərə görə şans qazanmadım. Artıq bütün diqqətimi “Hall Siti”yə yönəltmişəm. Jorje Jezuşun başçılığı altında performansım daha da yüksələ bilərdimi? Bu suala cavab verə bilməyəcəm. Çünki Jezuşun komandasında oynamamışam. Mən “Fənər”ə yollananda orda başqa məşqçi var idi. Jezuşa “Fənər”də uğurlar arzulayıram. Məni ən çox üzən məqam zədə səbəbindən DÇ-dən kənar qalmağım oldu. 21 yaşımda DÇ təcrübəsi yaşamaq mənim üçün önəmli idi. Ona görə də çox üzüldüm. DÇ-də favoritim yoxdu. Sadəcə, oyunları izləyib zövq almağa çalışıram”.
