Son dönəmlərdə maraqlı transfer xəbərləri ilə gündəmə gələn “Fatih Karagümrük” son qərarı ilə yenidən diqqət mərkəzinə düşüb.

Football-plus.az xəbər verir ki, Andrea Pirlonun çalışdırdığı İstanbul təmsilçisi bir müddət öncə azad agent statusunda olan Adəm Lyayiçlə Sofian Fequli kimi tanınmış oyunçuları heyətinə qatmışdı.

Bu dəfə isə ayrılıq xəbəri gəlib. Klubdan verilən rəsmi məlumatda Canər Ərkinlə müqavilənin qarşılıqlı şəkildə ləğv olunduğu açıqlanıb. Təcrübəli sol cinah müdafiəçisi İstanbul klubuna ötən mövsümün əvvəlində “Fənərbaxça”dan ayrılaraq gəlmişdi. Canərin ayrılmasını sürpriz adlandırmaq olar. Çünki 34 yaşlı futbolçu komandasının aparıcı üzvlərindən sayılırdı. Canər hətta hazırda assistentlər yarışına başçılıq edir! O, bu mövsüm superliqada hamısında 90 dəqiqə meydanda qalmaqla 12 oyun keçirib və və 6 məhsuldar ötürmə verib. Hətta sentyabrda Ştefan Kunts Ərkini Türkiyə yığmasına dəvət etməyəndə həm klub, həm də futbolçu özü bu duruma etirazını bildrimişdi. Bütün bunları nəzərə alanda “Fatih Karagümrük”ün qərarı futbolsevərlər üçün gözlənilməz oldu. Bu addımın hansı səbəbə görə atıldığı dəqiq olaraq bilinməsə də, gəzən şaiyələrə görə Canər Ərkin DÇ ilə bağlı yaranmış fasilənin ardından komandanın düşərgəsinə vaxtında qayıtmayıb (bəzi mənbələr onun ümumiyyətlə qayıtmadığını iddia edir). Bu üzdən onun həm Pirlo, həm də rəhbərliklə münasibətləri pozulub. Bir şey dəqiqdi ki, artıq bu oyunçunu “Fatih Karagümrük”ün heyətində görməyəcəyik. Türkiyə mətbuatının yazdığına inansaq, Canərin bu cür məsuliyyətsizlik etməsinin arxasında onun “Beşiktaş”dan təklif alması dayanır! Deyilənə görə “Qartal”ın çalışdırıcısı Şenol Günəş təcrübəli müdafiəçiyə zəng vuraraq onu yenidən komandasında görmək istədiyini deyib.

Canər daha öncə 3 mövsüm (2016-19) “Beşiktaş”da Günəşin başçılığı altında oynayıb. Xüsusilə 2016/17-də qazanılan çempionluqda bu futbolçunun da əməyi az olmamışdı. Ümumilikdə Canər “Beşiktaş”da keçirdiyi 4 mövsüm ərzində 122 rəsmi matçda 6 qol, 31 məhsuldar ötürməlik performans sərgiləyib.