Premyer-liqanın 16-cı turunda "Zirə" "Turan Tovuz"a 2:1 hesabı ilə qalib gəldi.

Football-plus.az xəbər verir ki, oyundan sonra keçirilən mətbuat konfransında tovuzluların çalışdırıcısı Ayxan Abbasov görüş haqda fikirlərini səsləndirdikdən sonra media mənsublarının suallarını cavablandırdı:

- 2 aydı ki, səfərdə qələbə qazanmırsız. Nə düzgün getmir?
- Mən belə yanaşmazdım. Təzə qurulmuş komandayıq. Qarşımızda konkret məqsəd qoyulmayıb. Mütləq şəkildə səfərdə qələbə qazanmırıqsa, bu, bizim haqqımızda pis nəsə formalaşdırmamalıdı. Xal qazanmaq istəyirik. Ehtiyatımızı artırmaq niyyətindəyik. Çalışdığımız qədər aşağı pillələrdən uzaq olmaq istəyirik. Görürük ki, çətindi. Çünki aşağıdakılar da gərgin mübarizə aparırlar. Rəqiblər də qələbə qazanmaq istəyirlər. Düşünürəm ki, ikinci dövrə çətin olacaq. Üst səviyyəli komandalara qarşı səfərdə oynamaq asan olmur. Öz rəqiblərimizə qarşı qələbələrimiz olub. "Səbail"i, "Şamaxı"nı məğlub etmişik. "Neftçi" və "Kəpəz"lə bərabərə qalmışıq.

- Bu gün Şakirin adını çox hallandırırdız. İstədiyinizi verə bilmirdi?
- İkinci hissə rəqib sol cinahdan daha çox hücum edirdi. Keyta orda çıxış edirdi. Rəhim də bura çəkildi. Şakir diqqətli olmalı idi. Gənc futbolçudu. Mövqe səhvləri olurdu. İstəyirdik bunu düzəltsin. Şakir əsas heyət üzvüdü. Neçə oyundu ki, yüklənir. Amma diqqətli olmasını və inkişaf etməsini istəyirəm. Bu gün Ehtiramla Şakirin fəal olması komandanın hücum potensialının artması deməkdi.

- Kubokda "Kəpəz"i üstəsəz, yarımfinala vəsiqə qazanacaqsız. Bundan sonrası haqda nə düşünürsüz?
- Kuboku kənara qoyuram. Qışda güclənməyə ehtiyac var. Belə oynamaq çətindi. 2 mövqeyimiz var ki, oranı gücləndirmək lazımdı. Zədələr olur. Futbolda heç kim siğortalanmayıb. Bəzən elə oyunçu zədələnir ki, çıxılmaz vəziyyətdə qalırsan. Amma kubok önəmli turnirdi. "Kəpəz"in də şansl var. İlk ildə yarımfinalda oynamaq əla olar. Amma ordakı rəqiblərlə mübarizə aparmaq çox çətindi. Amma bu, futboldu. İndidən təslim olmaq olmaz. Qış fasiləsində rəhbərliklə danışığımız olacaq.

- Oyunlara nəzər salsaq, ev matçlarına ən çox azarkeş gələn klub sizindi. Futbol bu qədər sevən bölgənin komandasının çətin durumda olması sizi düşündürmür?
- Sağ olsunlar, azarkeşlərimiz 500 km yol qət edib matça gəliblər. Məğlub olanda belə bizə dəstək olurlar. Həftə içi Tovuzda oyunlar olanda azarkeşlərimiz bizə müraciət edir. Çünki hamı işdə olur. Matça baxmaq istəyirlər. Ümid edək ki, gələcəkdə işıqlandırma sistemimiz olsun. Həftə içi belə olsa, oyunlarımız axşam keçrilsin. Tovuzda futbola sevgi çoxdu. İstəyirlər ki, iddialı komanda formalaşsın. Səbirli olmaq lazımdı. İnşallah, yaxşı olar. İnkişaf etmək lazımdı.

- Deyəsən, İnqilab Məmmədovun idarəçiliyindən narazı qaldız?
- Komandalar olduqca əla mübarizə apardılar. Heç kim bir-birindən çəkinmədi. İnqilab da tempi qorudu. Bir epizodda cərimə zərbəsi vurulanda ara məsafəsi bir az çox idi. Məncə, 9 metr deyildi. Hətta çox idi. Biz də qıraqdan etiraz etdik. Düzdü, bir az aqressiv oldu. Amma bu, oyundu. Bəzən belə şeylər olur.