Misli premyer-liqasında 10-cu turun “Sabah” – “Zirə” (1:0) oyunundan sonra təşkil edilən mətbuat konfransında qonaq komandanın baş məşqçisi Rəşad Sadıqov jurnalistlərin suallarını cavablandırdı.

"Football-plus.az" xəbər verir ki, o, əvvəlcə matç barədə fikirlərini bildirdi...

- Sürətli, gərgin oyun oldu. Rəqib ilk dəqiqələrdən irəli atıldı. Buna hazırlaşmışdıq. Oyun getdikcə istədiyimiz temp alınırdı. İki 100 faizlik qol epizodu yaratdıq. Həlledici məqam bunlardan yararlanmamağımız oldu. Oyun soyuyarkən qol buraxmağımız məyussedicidi. Hesabda geri düşəndən və azlıqda qalandan sonra hücuma atıldıq. Oyun qopmuşdu, risk edirdik. Futbolçularım yaxşı mübarizə apardılar. Bu gün hər iki komanda qələbə qazana bilərdi. Kim qol vursa, qalib gələcəkdi. Rəqibi təbrik edirəm. Bu oyunu unudub, qarşıdakı matçlara köklənməliyik.

- Coşqun Diniyev etiraza görə qırmızı vərəqə aldı...

- Sizə Azərbaycan futbolundan 1 saatlıq video göstərərəm ki, ilk “sarı”sı olan futbolçu etiraza görə qırmızı almır. Baş hakim Elçin Məsiyevə sual verdim ki, neçə belə ikinci sarı vermisən? Fikirləşdi və cavab vermədi. Kritik məqamda azlıqda qalmaq komandanı oyundan qoparır. Belə soyuqqanlı qərarlar “Zirə”yə qarşı olur. Nə isə... Hakimlikdən çox danışmaq istəmirəm.

- Hakimlərin problemi Rəşad Sadıqovladı, yoxsa “Zirə” ilə?

- Bilmirəm.

- İki oyunçunuz zədələndi...

- Keyta məcburi əvəzləndi. Hamdauidə ağrılar oldu. Keytanın zədələnməsi itkidi. Sonradan meydana çıxanlar da yaxşı oynadı.

- Mehdi Cənnətovun zədəsi nə yerdədi?

- Bəzən elə zədələr olur ki, həkimlər qeyri-müəyyən vaxt proqnoz edirlər. Mehdidə də belədi. Sağalmağını gözləyirik.

- Yeni transfer İssa Cibril qışdan oynaya biləcək. Bu, niyə belə alındı?

- Avqustdan danışıqlar aparırdıq. Futbolçu sərbəst idi. Milli fasilədən sonra bizə qoşulmalı idi. Bəzi texniki səhvlər baş verib. Ona görə qışdan oynaya biləcək. Bəyəndiyimiz futbolçudu.

- Coşqun Diniyev qırmızı vərəqə alandan sonra hirsini cilovlaya bilmədi...

- Nəyisə sındırdığını bilmirəm. Ola bilər, hirsindən harasa vurub. Mənə belə qırmızı versələr, bəlkə daha betərini edərdim.

- Ona haqq qazandırırsız?

- Xeyir. Futbolçularımın səbirli olmasını istəyirəm. Amma biz də anlayışlı olmalıyıq.