Bu gün premyer-liqanın 16-cı turunda "Sabah" "Şamaxı" ilə heç-heçə edib - 1:1.

Football-plus.az xəbər verir ki, oyundan sonra keçirilən mətbuat konfransında Murad Musayev iştirak edərək qarşılaşmanı şərh edərək jurnalistlərin suallarını cavablandırdı:

"Demək olar ki, bu gün rəqibdən tamamilə üstün idik. "Şamaxı"nın təhlükəli epizodu yox idi. Təəssüf edirəm ki, bu gün qələbə qazana bilmədik. 10 nəfərlə qalmağımıza baxmayaraq matç bizim nəzarətimiz altında idi. Qələbə qazanmamışıqsa, günahı özümüzdə axtarmalıyıq. 25-ci dəqiqədə lazımsız hərəkətə görə qırmızı vərəqə gördük. Hazırda ikili hisslərim var. Komandaya ikinci hissədəki oyuna görə təşəkkür edirəm. Amma bu cür görüşlərdə 3 xal qazanmalıyıq.


- "Sabah" iddialı komandalarla daha baxımlı futbol oynayır, digər rəqiblərlə matçlarda sanki çətinlik çəkir. Bunun səbəbi nədir?
- Müdafiə olunan komandalara qarşı oynamaq çox çətindi. Belə matçlarda əlinə düşən fürsətləri dəyərləndirmirsənsə, günahkar özünsən.

- Sebalyos qol vurdu, sonra qırmızı vərəqə gördü. O, qəhrəmandı, yoxsa anti-qəhrəman?
- Qəhrəmanlıq barədə heç nə deyə bilmərəm. Oyun epizodunda qırmızı vərəqə alsaydı, nəsə demək olardı. Nizam-intizamı pozub belə qırmızı vərəqə görürsənsə, qəhrəmanlıqdan söhbət gedə bilməz. Çünki, ona görə bu gün 2 xal itirdik.

- Dünən "Neftçi" "Qarabağ"a məğlub oldu. Bu, futbolçularda arxayınlıq yaradıb?
- Qələbə seriyalarından sonra peşəkarlıq ortaya çıxır. İddiamız varsa, avrokuboklara getmək uğrunda oynayırıqsa, peşəkarlığı heç vaxt unutmamalıyıq. Bu gün motivasiyanın çatmadığını deməzdim. Amma səhvlər etdik.

- Aleksey İsayevin durumu necədi?
- Heç nə deyə bilmərəm. Tibbi müayinədən sonra durumu aydın olacaq.