“Klublarımızın 90 faizinin loqosu dəyişməlidi” - PFL-in loqo müsabiqəsinin qalibi
PFL-in yeni loqosu müəyyənləşib.
Football-plus.az xəbər verir ki, 130 nümunə arasından qalib seçilən Fərhad Sultanovun dizayn etdiyi loqo özündə bir neçə amili ehtiva edir:
1) Loqoda futbolu ifadə edən top təsvir olunub;
2) Mərkəzdə alov və buta silueti var. Bunlar odlar yurdu Azərbaycana işarədi;
3) Loqodakı kürə qlobal dünya futbolunun rəmzidi;
4) Alov və buta ilə ayrılan sahə qlobal futbolun ayrılmaz hissəsi kimi bizim futbolu ifadə edir.
Qurumun elan etdiyi müsabiqəsinin qalibi mükafatlandırılıb. Ən yaxşı loqonu hazırlayan Fərhad Sultanov 2 min manat mükafat qazanıb.
Hamıya bəllidi ki, PFL 4 loqonu müəyyən etdikdən sonra onlar arasından birini seçilməsi üçün ictimaiyyət arasında sorğu keçirdi. Yekunda Fərhad bəyin işi üzərində dayanıldı. Görəsən, PFL özü ictimaiyyətin fikri ilə razıdı? Qurum rəsmiləri yeni loqonu bəyənib? Məsələ ilə bağlı fikirlərini öyrənmək üçün PFL-in media və marketinq direktoru Sənan Abdullayevlə əlaqə saxladıq. Qurum rəsmisinin yeni loqo ilə bağlı fikri belə oldu:
“Ümumiyyətlə, loqo müsabiqəsi elan olunanda gözlədiyimiz tənqidlərlə, iradlarla qarşılaşdıq. PFL-i hətta qeyri-ciddilikdə ittiham edənlər də oldu. Hansısa konkret bir şirkətlə anlaşıb real peşəkar iş əldə etməyə çalışmamaqda günahlandırırdılar. Amma Elxan müəllimin rəhbərliyi ilə idarə heyətinin toplantısında tənqid axını ehtimalına baxmayaraq, sırf bu addımda hər kəs üçün bir şans yaratmaq qərarına gəlindi. Yekunda 130 nümunə arasından seçim aparıldı. Məhz bu üzdən son qərarın verilməsi uzun çəkdi. Bildiyiniz kimi, PFL-in sosial şəbəkə hesablarında dörd loqo üçün səsvermə keçirildi. Burda açıq fərqlə bu loqo üstün oldu. Sonradan idarə heyətində bir daha müzakirə olunaraq qərar verildi. Sadəcə, müəllifdən yeni rəng çalarları qatması xahiş olundu və yekunda hazırkı loqo araya-ərsəyə gəldi. Şəxsən mənim də ən çox bəyəndiyim loqo bu idi. Rəngin də fərqli olduğunu düşünürəm. Ən əsası ədalətli seçimin olması idi. Bir məqamı da qeyd edim ki, elan olunan vaxt bitəndən bir neçə saat sonra göndərilən bir neçə loqo var idi. Onlar rəqabət apara bilərdi. Amma Elxan müəllim vaxtında müraciət edən şəxslərə haqsızlıq olmasın deyə, belə loqoların müzakirə olunmasına razılıq vermədi”.
Görəsən, Fərhad bəy qalib olması ilə bağlı nə düşünür? Bundan öncə hansısa qurum üçün loqo hazırlayıbmı? Sultanovun suallarımıza cavabına keçid alaq:
“Əvvəlcə 130 loqo arasından dördü seçildi. Daha sonra 2 iş qaldı. Yekunda mən qalib oldum. Frilanser olaraq dizayner kimi çalışıram. İlk dəfə bu yarışı görəndə dedim ki, mütləq şəkildə mən də qatılmalıyam. İlk cızma-qaranı etdikdən sonra onun elektron variantını quruma göndərdim. Daha sonra xəbər çıxdı ki, ilk “4-lük”də yer almışam. Mənim üçün çox xoş idi. Açığı, gözləmirdim. Həqiqətən də mənim üçün həyəcanlı bir məqam idi. Daha sonra seçim üçün yenə vaxt istənildi. Sonda 2 loqo qaldı. Bizi dəvət etdilər PFL-ə, fikrimizi öyrəndilər. Loqoda nə gördüyümüzü, nə fikir ifadə etdiyimizi soruşdular. Mənim loqomda dünya forması var. Burda milli ornament olan buta yerləşdirilib. Bundan əlavə, loqoda top və məşəl formasında alov var. Bunu da deyim ki, sonra xırda dəyişiklik etdik. Alov formasının rəngini turkuaz etdik. Bu hazırda gündəmdə olan rəngdi. Daha sonra qurum özü seçim etdi. Yekunda qalib oldum. Məni ofisə dəvət etdilər. Prezident mükafat təqdim etdi. Həqiqətən qürurlu anlar yaşadım. Onlara da söylədim ki, ölkədə 130 loqonun arasından mənim işimin seçilməsi böyük fəxrdi. Bundan öncə özəl şirkətlər üçün işləmişəm. Sözsüz, futboldankənar şirkətlər olub. Özüm də bu idman növü ilə maraqlanıram. Bəlkə bunun da bir təsiri var idi”.
Fərhad bəydən ölkə futbolu ilə maraqlanıb-maraqlanmadığını və hansı klubun yeni loqoya ehtiyacının olduğunu da soruşduq:
“Əlbəttə, çempionatımızla maraqlanıram, oyunları izləyirəm. Əslində klublarımızın 90 faizinin loqosu dəyişməlidi. Rebrendinqə ehtiyacları var. Çünki loqoları köhnəlib. Onların çoxu milli ornamentlər üzərində qurulub. İşlər birbaşa nə üçün hazırlandığını göstərirdi. Artıq tendensiyalar da dəyişir. İndi loqolarda fikirləri açıq-aşkar bildirməyə ehtiyac yoxdu. Başqaları işə baxanda dərhal mənasını anlamamalıdı. Qısaca onu deyim ki, bizim klubların loqoları köhnə qaydalara uyğun hazırlanıb. Düşünürəm ki, PFL-dən sonra bütün klublar da rebrendiq haqda düşünər. Onlar da ədalətli tenderlər elan etsələr, mütləq şəkildə qatılaram. “Neftçi” və yenidən premyer-liqaya dönən “Kəpəz” üçün loqo hazırlamaq istəyərəm. Belə bir şansımın olub-olmayacağını zaman göstərəcək”.
İLKİN SULTANLI
Digər xəbərlər
