“Şamaxı” Misli premyer-liqasında ardıcıl ikinci qələbəsini qazandı.

Çoxlarının autsayder gözüylə baxdığı bölgə təmsilçisi üçün yetərincə ciddi nəticədi. Ən diqqətçəkən məqam odu ki, “Şamaxı” hədəflərini düzgün müəyyənləşdirib. Cavid Hüseynovla Vüqar Əsgərovun birlikdə çalışdırdığı komanda gücünü düzgün bölüşdürür və əsasən özünə uyğun rəqibləri büdrətməyə çalışır. Orası məlum məsələdi ki, hər bir rəqibə qarşı meydanda gücünü qoyursan, qələbə qazanmaq üçün mübarizə aparırsan. Amma ortada həm də güc nisbəti, səviyyə fərqi deyilən anlayışlar var. Birdən-birə onları dəyişmək heç də asan məsələ deyil. Bəli, futbol meydanlarında sürpriz nəticələr də qeydə alınır. Bir də görürsən ki, turnir cədvəlinin sonuncusu liderlər qrupundakı rəqibini büdrətdi, ondan xal aldı. “Şamaxı” iki qarşılaşmada “Qarabağ”a məğlub olub, bir dəfə isə “Neftçi”yə. “Sabah”la keçirilən görüş də onlar üçün uğursuz nəticələnib, doğma meydanda məğlubiyyətə üzülən tərəf “Şamaxı” olub. Heç həmin üç xal da Murad Musayevin komandasına asanlıqla başa gəlməmişdi, Masazırdan gələn qonaqlar yalnız sona yaxın qələbə qoluna sevinmişdi.

Mövsümün əvvəli “Şamaxı” üçün heç də asan keçmədi. Bu da gözlənilən idi. “Keşlə”nin bölgəyə köçürülməsi və adının dəyişdirilməsi sayəsində yaranan klub heyətini tam dəyişmişdi. Yayda eşidirdik ki, klubla müqavilə müddəti davam edən futbolçular belə orda qalmaq istəmir, anlaşmanın təzminatsız pozulması üçün məşqə çıxmaqdan imtina edənlər belə var. Yeri gəlmişkən, “Şamaxı” artıq həmin futbolçuların komandalarını da cəzalandırmağa imkan tapıb. Bu barədə bir qədər sonra yenindən söhbət açacarıq. Qayıdaq ora ki, mövsümün əvvəli “Şamaxı” üçün uğursuz alındı. Bunun da çox ciddi, obyektiv səbəbi vardı. Cavid Hüseynovla Siyasət Əsgərovun sərəncamında olanlar bütünlüklə yerli futbolçular idi. Özü də həmin futbolçuların böyük əksəriyyəti elita təcrübəsi olmayanlar, yaxud da premyer-liqada bir-iki oyun keçirənlər idi. Belədə onların qarşısına böyük hədəflər qoymaq, qələbələr gözləmək də ciddi görünməzdi. Amma elə ilk turdaca “Şamaxı” göstərdi ki, heç də aşkar autsayder olmaq fikrində deyil. Sizin də yadınızda olar, “Neftçi”nin baş məşqçisi Laurentsiu Regekampf Şamaxı səfərində bir çox aparıcı futbolçusuna istirahət vermişdi, start heyətində, demək olar ki, ehtiyat qüvvə meydana çıxmışdı. Həm çalışdırıcı, həm də “Neftçi” fanatları düşünürdü ki, asan qələbəyə sevinəcək, görüşün taleyini artıq birinci hissədə həll edəcəklər. Düzdü, “Neftçi” qələbə qazandı. Lakin çox çətinliklə. Qələbə topunu o zaman vurmaq mümkün oldu ki, əsas futbolçular “döyüşə atıldı”. Heç də təsadüfi deyildi ki, “Neftçi”yə 3 xal qazandıran qolu Emin Mahmudov vurdu.

“Şamaxı” ilk qolunu Qəbələ səfərində vurdu, Amil Yunanov sabiq komandasını cəzalandırdı. Həmin qol “Şamaxı”ya qələbə gətirməsə də, gələcəyə ümidlə baxmağa əsas yaranmışdı. Artıq 3-cü turda “Şamaxı” ilk xalını qazandı. Özü də az əvvəl qeyd etdiyim kimi, xal da “Şamaxı” üçün rəqib sayılacaq rəqiblə oyunda qazanıldı. “Səbail”, “Turan Tovuz”, “Kəpəz” və “Sumqayıt” gücü və səviyyəsi bəlli olan rəqiblərdi. Və bu komandalar “Şamaxı”yla təxminən eyni hədəflər uğrunda mübarizə aparır. Yəni turnir cədvəlinin sonuncusu olmamaq, mümkün qədər yuxarı yerlərdə qərarlaşmaq üçün. Məlum məsələdi ki, onlar mükafatlar və ya avrokuboklara düşmək uğrunda yarışa bilməz. “Şamaxı” da məhz bu komandalarla qarşılaşmalarda daha yüksək motivasiya ilə oynayır. Yeganə bəxtsizlik onda oldu ki, “aslanlar” əsas qol ümidlərindən sayılan Amil Yunanovu məhz “Turan Tovuz”la doğma meydandakı oyunda itirdi. İsti havanın müşayiəti ilə süni örtüklü meydanda keçirilən qarşılaşmanın ilk dəqiqələrində Yunanov ağır xəsarət aldı və uzun müddətə sıradan çıxdı. Görüşün sonunda da meydan sahibləri xalsız qaldı.

Artıq bu məğlubiyyətin əvəzi artıqlamasıyla çıxılıb. Ötən tur “Şamaxı” Tovuz səfərindən üç qolla və üç xalla qayıtdı. “Aslanlar”ın növbəti “şikarı” isə “Sumqayıt” oldu. “Doğma divarlar”ın və azarkeşlərin köməyi ilə gənc “şamaxılılar” rəqibin qapısına düz 4 dəfə yol tapdı. Bu yerdə onu da xatırladım ki, “Şamaxı” ilk dövrədə keçirilən görüşdə “Sumqayıt”a uduzmamış, səfərdən bir xalla qayıtmışdı. “Aslanlar” “Səbail”ə də səfərdə uduzmadı, “ASCO Arena”da keçirilən görüşdə qapılara qol vurulmadı. Buna qədər isə Cavid Hüseynovla Siyasət Əsgərovun birgə çalışdırdığı komanda öz meydanında “Qəbələ”dən də xal almışdı. Artıq “Şamaxı”nın hesabında 10 xal var. Bölgə təmsilçisi “Kəpəz”lə “Sumqayıt”ı geridə qoyub, xalını “Səbail”lə eyniləşdirib. “Sumqayıt”ın heyətində 9 əcnəbi futbolçu var. “Səbai” və “Kəpəz”də bu say yeddiyə bərabərdi. Yeri gəlmişkən, “Şamaxı”nın ötən tur səfərdə məğlub etdiyi “Turan Tovuz”da əcnəbi sayı səkkizdi. “Şamaxı” qazandığı nəticələrə hər kəsə sübut etdi ki, yararsız legionerlərə qucaq açmaq əvəzinə yerli gənclərə güvənmək daha faydalıdı. Halal olsun!

AMAL