Misli premyer-liqasında 13-cü turun oyunları keçirilir.

"Sabah" səfərdə "Səbail"dən güclü olub - 2:0. Matçdan sonra qonaqların çalışdırıcısı Murad Musayevin mətbuat konfransı keçirilib. Sizi mütəxəssisin fikirləri ilə tanış edirik:

- “Neftçi” dünən iki vacib xal itirdi. Necə fikirləşirsiz, çempionluq yarışında iki komanda qaldı?
- Hələ çox az tur oynanılıb. Futbolda hər şey dəyişə bilər. Çempionluq yarışı barədə yox, qarşıdan gələn matçlar barədə fikirləşirik.

- Ötən mövsüm bu meydanın durumundan narazılıqlar var idi. Örtük dəyişdirilib, ancaq yenə də ilk hissədə oyunçularınızın çətinlik çəkdiyi görülürdü...
- Köhnə qazonla müqayisədə, təbii ki, daha yaxşıdı. Amma ilk 20 dəqiqədə meydana adaptasiya olmağa çalışdıq. Təbii örtüyə uyğunlaşmışıq. Azərbaycan cənub ölkəsidi. İstərdik ki, bütün meydanlar təbii örtüklü olsun. Ancaq bu, hər klubun imkanlarından asılıdı.

- Qarşıdan “Qarabağ”la oyun gəlir...
- “Qarabağ” Avropa səviyyəsində komandadı. Onlarla matç böyük oyun olacaq. Belə matçlar üçün hazırlaşırıq. Özümüzə inanmalıyıq.

- Boyan Letiç azərbaycanlı gənc futbolçulara əsəbiləşirdi. Ona meydanda xüsusi imtiyaz vermisiz?
- Mən azərbaycanlı və digər futbolçuları ayırmazdım. Oyun ərzində emosiyalar olur. Matçdan sonra hamısı bir-birinin əlini sıxıb qələbəyə sevinirlər.

- “Qarabağ”la matçı klubunuzun rəhbərliyi izləyirdi. Onlarla bu barədə söhbətiniz olub?
- Xeyr. Bu barədə danışmamışıq.

- “Sabah”ın bir neçə aparıcı yerli futbolçusunun “Qarabağ”ın maraq dairəsində olduğu barədə xəbərlər var. Bu, sizi qayğılandırmır?
- Məncə, hamısı şayiələrdi. Təklif gəlsə, rəhbərlik bizə bildirərdi. Belə şayiələri müzakirə etmək lazım deyil.