Çempionlar Liqasının ardından bu gün Avropa və Konfrans Liqasında da qrup mərhələsinə yekun vurulacaq.

Football-plus.az xəbər verir ki, Türkiyəni bu mövsüm avrokuboklarda uğurla təmsil edən, Avropa arenasında keçirdiyi son 9 qarşılaşmada uduzmamaqla şəxsi rekordunu təkrarlayan “Fənərbaxça” Krakovda çox mühüm bir oyuna çıxacaq. İstanbul nəhəngi Kiyev “Dinamo”su ilə səfər matçını məlum səbəblər üzündən məhz bu şəhərdə keçirəcək. “Sarı-lacivərdlilər” həm məğlubiyyətsiz seriyanı uzadaraq şəxsi rekordunu yeniləməyə, həm də qrup liderliyini rəsmiləşdirməyə çalışacaq. “Renn”lə dueldə şəxsi oyunlarda bərabərlik olduğundan top fərqi əsas götürüləcək. Yayda ÇL-in təsnifatında məhz elə “Dinamo”ya uduzaraq bu turnirdə mübarizəni davam etdirə bilməyən istanbulluların həm də bu rəqiblə öz haqq-hesabı var.

Bu arada matçın hakimlər briqadası məlum olandan sonra sözün əsl mənasında qiyamət qopdu. Əsas hakim 38 yaşlı xorvatiyalı Duye Strukan, yan xətt hakimləri Boyan Zobenitsa və Alen Yaksiçdi. Bura qədər heç bir problem yoxdu. Amma 4-cü hakimin İvan Bebek olması “Fənərbaxça” düşərgəsində böyük narazılıqla qarşılandı. Bu ad bütün “Fənər”lilərə gözəl tanışdı. 2016-cı il martın 17-də AL-in 1/8 finalının cavab oyunu çərçivəsində Portuqaliyada “Braqa”ya qarşı matçda məhz bu ədalət təmsilçisi komandanı sanki dilim-dilim doğramışdı. Oyun 1:1 hesabı ilə davam edərkən Bebek 66-cı dəqiqədən sonra “Fənər”in 3 oyunçusuna – Mehmet Topal, Alpər Potuk, Volkan Şənə qırmızı vərəqə göstərmiş, eləcə də baş məşqçi Vitor Pereyranı tribunaya göndərmişdi. 1:4 hesabı ilə uduzaraq mübarizəni dayandıran “Fənər” həmin qalmaqallı idarəçilikdən sonra həm UEFA-ya, həm də Türkiyə Futbol Federasiyasına rəsmi şikayət ünvanlamış, Bebek də bir neçə aylıq cəza almışdı. Belə bir şəxsin 4-cü hakim kimi olsa belə, yenidən “Fənər”in oyununa təyin edilməsinin camiədə birmənalı qarşılanmaması normaldı. Bu üzdən heç kimin başı ağrımasın deyə 4-cü hakim dərhal dəyişdirildi. “Dinamo” – “Fənər” oyununda bu funksiyanı Marin Vidulin icra edəcək! Əvvəlcə belə güman olunurdu ki, Bebek özü bu qarşılaşmada iştirak etmək istəmədiyini UEFA-ya bildirib. Amma reallıq başqa cür imiş. Türkiyəli həmkarlarımızın bu məsələni bir qədər dərindən araşdırmasından sonra ortaya maraqlı faktlar çıxdı. Əvvəla məlum oldu ki, Bebeki bu oyuna UEFA yox, Xorvatiya Futbol Federasiyası (XFF) təyin edibmiş. UEFA oyunlara yalnız əsas hakimi və köməkçilərini təyin edir. 4-cü hakimi isə hakimlər briqadasının aid olduğu ölkənin federasiyası müəyyənləşdirir. Təsadüfə bax ki, Bebek Avropa karyerasını bitirməyə hazırlaşırdı və XFF onu “Fənər”in oyununa göndərməklə 45 yaşlı ədalət təmsilçisinə kiçik bir jest etmək istəyirdi. Hər halda, bu, Türkiyə mətbuatının iddiasıdı. Amma “Fənər” cəbhəsinin hay-küy qaldırmasından sonra UEFA Bebekdən İstanbul nəhəngi ilə problemi olub-olmadığını soruşub. Bebek keçmişdə problem yaşadığını etiraf edincə, UEFA XFF-dən 4-cü hakim kimi başqa ədalət təmsilçisinin təyin olunmasını tələb edib. Bu üzdən Bebeki Vidulin əvəzləyib.