Premyer Liqanın 25-ci turunun “Qarabağ” – “Sabah” matçından sonra qonaq komandanın baş məşqçisi Murad Musayev mətbuat konfransında jurnalistlərin suallarını cavablandırıb.

"Football-plus.az" xəbər verir ki, ​“Qarabağ”ı layiqli çempionluq münasibətilə təbrik edən baş məşqçi, onların bu mövsüm açıq-aşkar ən güclü komanda olduqlarını vurğulayıb:

"Bundan əlavə avrokuboklarda parlaq şəkildə çıxış etdilər. Çox yaxşı iş görüblər, yenidən onları təbrik edirəm. Oyuna gəldikdə, qırmızı vərəqəyə qədər “Qarabağ” bizdən güclü və aqressiv oynayırdı. Demək olar ki, bizim üçün çətinliklər yaratdı. Amma futbol ona görə gözəldi ki, bir hərəkət oyunun gedişatını dəyişə bilər. Oyun azarkeşlərin xoşuna gəldi. Emosiyalar çox idi. Hər iki komanda da nəticədən məmnun qaldı".

Murad Musayev Çempionlar Liqasında "Qarabağ"dan gözləntilərini danışıb. Komandanın birbaşa qrup mərhələsinə düşməyəcəyini bildirən baş məşqçi, onların qrupa düşməyə qadir olduqlarını diqqətə çatdırıb:

"Ev oyunlarında stadion dolu olanda, “Qarabağ” hər bir rəqibi uda bilər".