Halep dopinqə görə cəzalandı
“Bu gün həyatımdakı ən çətin oyun – həqiqət uğrunda mübarizə başlayır”
Football-plus.az xəbər verir ki, dünyanın sabiq 1 nömrəli raketkası, rumıniyalı Simona Halep antidopinq qaydalarını pozduğuna görə idmandan qeyri-müəyyən müddətə uzaqlaşdırılıb. Bu haqda xəbər Beynəlxaq Tennisin Bütövlüyü Agentliyinin (ITIA) saytında yer alıb. Halep avqustda keçirilən ABŞ Açıq Tennis Çempionatında dopinq-testdən keçib. A nümunəsində yasaq roksadastat preparatı aşkarlanıb. 31 yaşlı tennisçi B nümunəsini yoxlamağı da xahiş etsə də, nəticə eyni olub.
Halep tennisdən uzaqlaşdırılmasına belə münasibət bildirib:
“Bu gün həyatımdakı ən çətin oyun – həqiqət uğrunda mübarizə başlayır. Mənə xəbər verdilər ki, dopinq-test yoxlaması zamanı orqanizmimdə az həcmdə olsa da, roksadastat üzə çıxıb. Həyatımın ən böyük şokunu yaşadım. Bütün karyeram boyunca fırıldaqçılıqla bağlı fikir ağlımın ucundan belə keçməyib. Çünki bu, mənə öyrədilən bütün dəyərlərə ziddi. Belə ədalətsiz vəziyyətlə üzləşəndən sonra özümü tam məyus və satılmış kimi hiss edirəm. Heç vaxt bilərəkdən yasaq preparat qəbul etmədiyimi sübuta yetirmək üçün sona qədər mübarizə aparacam və inanıram ki, gec-tez həqiqət üzə çıxacaq. Məsələ pulda və ya titullarda deyil. Söhbət şərəfdən və son 25 ildə tennisə bəslədiyim sevgidən gedir”.
Halep WTA bayrağı altında keçirilən 24 turnirin, həmçinin 2018-ci ildə keçirilən “Rolan Qarros”un və 2019-cu ildə keçirilən “Uimbldon”un qalibidi.
Digər xəbərlər
