Varan: ''Qətərə DÇ-ni biz futbolçular verməmişik''
Qətərdə keçiriləcək DÇ-2022-nin startına 1 aydan da az vaxt qalıb.
Amma hələ də bu cür nəhəng turnirin Qətər kimi insan haqlarının ciddi şəkildə pozulduğu bir ölkəyə verilməsinin düzgün olub-olmaması mövzusu ətrafında söhbətlər səngimək bilmir. Qətərə DÇ-nin verilməsinin əleyhinə olanlar tez-tez ''futbolçular da bu duruma etiraz etməlidi'' fikrini səsləndirirlər. Bu arada Fransa yığmasının və ''Mançester Yunayted''in müdafiəçisi Rafael Varan bu cür fikir səsləndirənlərin cavabını bu sözlərlə verib:
''Təbii ki, futbolçuların da üzərində məsuliyyət var. Amma insanların daim bizi ön plana çıxarmağa çalışması düzgün deyil. Bu məsələni bizdən tez-tez soruşurlar və fikrimizi öyrənməyə çalışırlar. Amma dünya çempionatını Qətərə verəndə bizim fikrimizi heç kim soruşmamışdı! Bu məsələ bizim iştirakımız olmadan həll olunmuşdu. Ona görə də bunun düzgün və ya yanlış olmasına biz qərar verməməliyik. Heç kim kor deyil. Hər kəs nəyin necə olduğunu bilir. Hamı öz işi ilə məşğul olmalıdı''.
Yeri gəlmişkən, qeyd edək ki, Varan dünən ''Yunayted''in ''Çelsi''yə qarşı keçirdiyi oyunda zədələnərək meydanı göz yaşları içində tərk etdi. Onun mundialda iştirakı sual altındadı.
Digər xəbərlər
