Cüneyt Çakır karyerasını bitirdi, gələcəkdə nə edəcək? - AÇIQLAMA
Cüneyt Çakırdan yeni xəbər var.
Football-plus.az xəbər verir ki, Türkiyə futbolunun yetişdirdiyi ən böyük hakimlərdən biri, bəlkə də birincisi olan Çakır karyerasını bitirmək qərarına gəlib.
Ünlü ədalət təmsilçisi təxminən bir ay öncə verdiyi açıqlamada hələ yekun qərarını vermədiyini bildirmişdi. Amma Türkiyə Futbol Federasiyasının prezidenti Mehmet Büyükekşinin ''Bein Sports''a verdiyi son açıqlamadan belə məlum oldu ki, 45 yaşlı Çakır belə desək, fitini birdəfəlik mismardan asmaq qərarına gəlib. Amma o, Türkiyə futboluna xidmət etməkdə davam edəcək. Büyükekşini dinləyək:
''Ötən həftə Boluda hakimlər üçün toplanış və seminar təşkil etdik. O seminarda öyrəndik ki, Cüneyt Çakır Hakimlər Komitəsinə (HK) karyerasını bitirdiyini açıqlayıb. Çakır yazılı müraciətində qeyd edib ki, xaricdən bir çox təkliflər alsa da, karyerasını Türkiyədə başa vurmaq və sonrakı dönəmdə də yeni hakimlərin yetişdirilməsində böyük rol oynamaq niyyətindədi. Bu camiəyə fayda vermək və Türkiyə futbol ailəsinə borcunu bu şəkildə ödəmək istəyir. Onun bu istəyini həm federasiyanın idarə heyəti, həm də HK çox yaxşı qarşıladı. Yeni iş üçün istəkli və motivasiyalı olması bizi sevindirir. Biz son illərdə HK-nın baş məsləhətçisi vəzifəsinə, bildiyiniz kimi, yalnız əcnəbiləri gətiririk. Amma indi bu vəzifəyə dəyərli sabiq hakimimizi təyin etmək fürsətimiz olacaq. Ya da gələcəkdə necə ki, biz xaricdən məsləhətçi gətiririk, Çakır da eyni şəkildə başqa bir ölkədə hakimlərin yetişməsinə yardım edər. Çakır ölkə futbolu üçün çox dəyərli simadı. Bizi 2 DÇ, 3 AÇ-də təmsil edib və 2015-də ÇL-in finalına təyinat alıb. Çakır üçün bir yubiley matçı keçirmək planımız var. Onu Türkiyə hakimliyinə yaraşan şəkildə yola salacağıq. İndiyəqədərki çalışmalarına görə ona təşəkkür edir, bundan sonrakı fəaliyyətində də uğurlar arzulayırıq''.
ƏLİ
Digər xəbərlər
