“Siyasətçilər bizim təşkilata hörmət etməlidilər”
Oktyabrın 9-da Almaniyanın Frankfurt şəhərində AÇ-2024-ün seçmə turnirinin püşkü atıldı. Belarus yığmasının püşkatmada iştirakı ətrafında şübhələr hələ də davam edir.
Xatırladaq ki, hələ bir neçə həftə əvvəl Almaniyanın daxili işlər naziri Nensi Fayzer UEFA-ya müraciətlə Belarus millisinin AÇ-2024-ün seçmə turnirinə buraxılmamasını xahiş etmişdi. O, Belarusun Ukraynaya hərbi təcavüzü davam edən Rusiyaya dəstək verməsini əsas gətirmişdi. Lakin UEFA bu çağırışa məhəl qoymamış və Belarus püşkün nəticəsinə əsasən İsveçrə, İsrail, Rumıniya, Kosovo və Andorranın da daxil olduğu I qrupuna düşmüşdü.
UEFA-nın Belarus yığmasının qitə çempionatının seçmə mərhələsində iştirakının nə dərəcədə doğru olması ilə bağlı şübhəyə rəsmi reaksiyası belə olub:
“UEFA-nın İcraiyyə Komitəsi martda sonrakı xəbərdarlığa qədər Belarusda rəsmi oyunların keçirilməsini qadağan edib. O vaxtdan vəziyyət daim nəzarətimiz altındadı və zərurət yaranacağı halda yeni qərar verilə bilər”.
Qitə futbol qurumunun prezidenti Aleksander Çeferin də məsələyə münasibət bildirib. O, Almaniyanın “Bild” qəzetinə açıqlamasında belə deyib:
“Hamısını kənarlaşdırın!” çağırışı bir qədər populist fikirdi. Hazırda bunun üçün əsas görmürük. Nəsə dəyişəcəksə, mütləq vəziyyətə reaksiya verəcəyik. Siyasətçilər qərarların qəbulu zamanı bizim təşkilata hörmət etməlidilər. Biz ki onlara nə etməli olduqlarını demirik”.
Yeri gəlmişkən, Kosovo yığması ilə də bağlı problem ortaya çıxa bilər. Bu komandanın Belarusla eyni qrupda yarışacağını bir qədər əvvəl xatırlatdıq. Marqlıdı ki, həm Belarus, həm də Rumıniya Kosovonun müstəqilliyini tanımır. Frankfurtdakı püşkatmanın ertəsi günü Rumıniyanın GSP idman saytı yerli federasiyanın rəsmilərinin Kosovo ilə matçların mümkün təşkili ilə bağlı hökumətlə danışıq apardığı haqda xəbər yayıb. Rusiyanın “Matç TV” telekanalı bu mövzu ilə bağlı UEFA-ya göndərdiyi sorğuya cavab alıb. Kosovo ilə qarşılaşmalardan imtina edəcək komandaların bu rəqiblə oyunları ləğv ediləcək. Buna şərait yaradacaq yığmalara və təmsil etdikləri milli futbol qurumlarına sanksiyalar tətbiq olunacaq. Bunlar qitə çempionatının seçmə mərhələsinin reqlamentinin 30-cu maddəsində əks olunub. Sanksiyalar sırasında kosovolularla matçların baş tutmamasına səbəb olan komandanın AÇ-2024-ün seçmə turnirindən kənarlaşdırılması da nəzərdə tutulub.
Digər xəbərlər
