"Milli komanda hər ölkədə futbolun güzgüsü, ən yüksək zirvəsidi. Təbii, yığmaya baş məşqçi təyinatı həmişə müzakirə edilir, gündəm olur. Azərbaycan futbolunun problemləri isə daha qlobaldı. Futbola böyük maliyyə axını, dövlət qayğısı baş verəndən sonra 15 ildən çoxdu məşqçilər gəlir-gedir, eyni proses yenidən təkrarlanır. Hər məsələyə baxış dərin təhlillərə söykənməlidi. Millidə illərdi heç bir ciddi nəticə, irəliləyiş yoxdu. Belə durumda məşqçi dəyişikliklərindən daha çox ölkə futbolunun ümumi vəziyyət təhlil edilməli və düzgün qərarlar verilməlidi. Futbol ictimaiyyəti, sözünü deyən mütəxəssislər, jurnalistlər, azarkeşlər problemləri qabardır, bir çoxları çıxış yollarını göstərir. Futbolun qanunları var, son mərhələdə qərar verən qurum AFFA İcraiyyə Komitəsidi. O mərhələyə kimi isə federasiya rəsmiləri, icraçılar, daha dəqiqi, ideoloqlar prosedur qaydalarını həyata keçirir, danışıqlar aparılır, futbol adına yox, özləri üçün sərfəli addımlar atırlar. Məyusedici məqamlardan biri də milliyə can atan qüvvələrin yanlış strategiya qurmalarıdı. Ümumi futbol müzakirələri əvəzinə vəzifə uğrunda kabinet davaları baş qaldırır. Yaşıl meydanlarda zəif olsalar da, AFFA ideoloqları kabinet savaşlarında yığmaya iddialılardan daha güclüdülər. Pərakəndə mübarizə metodları, idarəçi təcrübəsizliyi, hətta təkəbbürlük sonda hər dəfə məğlubiyyətlə nəticələnir. Ümumi futbolun dirçəlməsi yolunda aparılan mübarizə çərçivəsində iddialar ortaya qoyulmalıdı. Əks halda vəzifə döyüşləri görüntüsü faktiki önə çıxır. Belə yanaşma AFFA-nı idarə edənlərə, məqsədlərini həyata keçirənlərə kömək edir, özləri də gözləmədən verəcəkləri qərarları asanlaşdırır. De Byazinin müqavilə müddətinin uzadılması haqda qərarın rahat şəkildə verilməsi qeyd olunanlara əyani sübutdu. Futbol problemlərinə kompleks şəkildə yanaşılmadan dirçəliş mümkünsüzdü, fərq etməz, millidə əcnəbi məşqçi olsun və ya yerli. İllərdi futbola cavabdehlər eyni yolu gedirlər, uçurumdu. Futbolda birlik olmadan, yaradılmadan, düşünən beyinlərə strateji cəhətdən güvənilmədən, ən azı məsləhətlərə qulaq asılmadan belə də davam edəcək. Foqstdan tutmuş De Byaziyə qədər əlcək kimi dəyişdirilən baş məşqçilər Azərbaycan futboluna heç bir ciddi uğur gətirməyiblər. Öncə futbol sisteminin özündə ciddi, əsaslı dönüş yaradılmalıdı".