"Yığmada baş məşqçi əcnəbi olacaqsa, mütləq iki yerli onun köməkçisi olmalıdı" - Ağasəlim Mircavadov
Yığma Millətlər Liqasının son üç oyununda maksimum nəticə göstərdi.
Football-plus.az xəbər verir ki, qrupdan çıxa bilməsək də, mübarizəni 2-ci pillədə tamamladıq. Komandanın oyununda müəyyən inkişaf gözə dəyir. İndi hamını Canni de Byazinin taleyi maraqlandırır. Onunla müqavilənin müddəti oktyabrın 1-də bitir. Görəsən, AFFA italiyalını postunda saxlayacaq, yoxsa başqa əcnəbi gələcək? Ümumiyyətlə, De Byazi ilə əməkdaşlığa son qoyulmalıdımı? Bu suallara aydınlıq gətirmək üçün Məşqçilər Komitəsinin üzvü Ağasəlim Mircavadova tribuna verdik:"Yalnız dərindən təhlil edəndən sonra qərar verilməlidi. Tələsmək lazım deyil. Sevinməyin də qaydasını bilmək lazımdı. Yaxşı olardı ki, Canni de Byazi seçmə mərhələnin əvvəlində də belə performans sərgiləyəydi. Son iki oyuna nəzər yetirsək, inkişaf var, futbolçular meydanda döyüşür, yaradıcı oyun mümayiş etdirir, məşqçi işi də göz önündədi. De Byazi postunda qalacaq, yoxsa başqa əcnəbi gətiriləcək - bu haqda nəsə deyə bilmərəm. Federasiya qərar verməlidi. Sadəcə, məşqçinin 2 il ərzindəki işi dərindən təhlil ediləndən sonra qərar verilməlidi. Yerli yox, əcnəbi mütəxəssisə üstünlük veririksə, təbii ki, onun qarşısına daha böyük tələblər qoyur, nəticə istəyirik. Həmişə bu düşüncədə olmuşam, yığmada baş məşqçi əcnəbi olacaqsa, mütləq iki yerli onun köməkçisi olmalı, ondan çox şey öyrənməli və püxtələşməlidi".
ABDULLA İSMAYILOĞLU
