"Canni de Byazinin baş məşqçi postunda qalıb-qalmaması barədə qəti fikir bildirmək çox çətindi. Bunun üçün əvvəlcə italiyalını o postda saxlamaq və ya göndərmək səlahiyyətinə malik olan AFFA və İcraiyyə Komitəsinin məqsədlərindən xəbərimiz olmalıdı. Bilmirəm, son illərdə futbolumuza cavabdeh olan şəxslər milli komandamızdan hansı nəticələr gözləyir? Çoxları deyir ki, De Byazinin qarşısına qrupdan çıxmaq məqsədi qoyulmuşdu. Mən nə AFFA rəhbərliyindən, nə də baş məşqçidən belə açıqlama eşitmişəm. Əsasən mətbuatda bu cür yazılara rast gəlmişəm. Lap deyək ki, baş məşqçinin qarşısına belə bir şərt qoyulub. De Byazi də işinin öhdəsindən gələ bilməyib. Belə olan halda hansı qərar verilməlidi?

De Byazi və ya ondan sonra milliyə rəhbərlik edəcək başqa bir namizədin qarşısına real şəraiti, ölkə çempionatının və yığmanın səviyyəsini nəzərə almadan qrup lideri olmaq vəzifəsi qoyanlar ya futboldan uzaq, ya da səs-küy yaratmaqda maraqlı şəxslərdi. Həmçinin baş məşqçi reallıqları nəzərə almadan qarşısına qoyulan öhdəliklərə “hə” deyirsə, özünü və ictimai aldatmaqla məşğuldu. Təbii ki, məşqçinin özgüvəni, əminliyi olmalıdı, amma bununla yanaşı, mövcud şərait, reallıq da gözdən keçirilməlidi, absurdcasına arxayınlıq, özgüvən olmamalıdı.

Ən əsası, hansısa mütəxəssisin milliyə gətirilməsinə və ya saxlanılmasına bir menecer kimi konkret cavab verməyim üçün müqavilə şərtlərindən, əsasən də maddiyatla bağlı detallardan tam agah olmalıyam. Baş məşqçini hansı maaşın, bonusların qarşılığında saxlamaq və ya gətirmək əsas şərtlərdən biridi. Ona görə də De Byazinin millidə qalması və ya yola salınmasıyla bağlı suallara qəti cavab verə bilmirəm. Bütün nəticələr, məsələlər, təkliflər dərindən təhlil olunmalıdı".