''Fənərbaxça''da xoşbəxtəm. Rio de Janeyroda uzun illər keçirdikdən sonra fərqli bir təcrübə yaşamaq istədim. ''Flamenqo''dan ayrılmaq heç də asan olmadı. Amma Avropada özümü sınamaq istəyi çoxdan beynimdə dolaşırdı. Həyat yoldaşımla birlikdə bu keçidin müsbət və mənfi tərəflərini götür-qoy etdikdən sonra Türkiyəyə yollanmaq qərarına gəldim. Atam da xeyir-dua verdi. Titullar qazana biləcəyim potensiallı bir kluba keçmək istəyirdim. ''Fənərbaxça'' da ''Flamenqo'' kimi böyük klubdu. Çoxlu fanatı var və təzyiq hiss olunur. Uzun illərdi çempion ola bilmirlər. Bu mövsümkü komanda bu uğursuzluğa son qoymaq üçün yaradılıb. Və belə bir komandaya mən də dəvət almışam. Jorje Jezuş zəng vuraraq bu layihə, mənim ordakı rolum və klubun hədəfləri barədə məlumat verdi. ''Fənərbaxça'' kimi bir klubdan təklif alırsansa, üstəlik orda Jezuş kimi bir məşqçi çalışırsa, ''yox'' demək mümkün deyil. Klubun vitse-prezidenti ilə də söhbət etdim. Məni tanıdıqlarını, bir çox oyunuma baxdıqlarını və Jezuş gəlməmişdən mənimlə maraqlandıqlarını dedi. Bu sözlər məni sevindirdi. Jezuş ''Flamenqo''da necə idisə, burda da elədi. Düzdü, insanlar hər zaman dəyişir və yeni şeylər öyrənirlər. Amma onun futbol sevgisi həmişəki kimidi. Hələ də meydanın kənarında böyük həvəslə qışqıraraq göstərişlər verir. Hər məşqdə bizə yeni şeylər öyrətməyə çalışır. ''Flamenqo'' ilə müqayisədə ''Fənərbaxça''da rolum bir qədər dəyişib. Burda mənə bir yox, bir neçə iş tapşırılıb. Üzərimdəki məsuliyyəti hiss edirəm. Fərqli taktika və sistemlər ilə oynayırıq. Bu sistem dəyişdikcə mənim də meydandakı rolum dəyişir. Avropa futbolu bu baxımdan Braziliya futbolundan çox fərqlənir. Türklərin futbol ehtirasının braziliyalılarla müqayisədə daha çox olduğunu deyə bilərəm. Bir ev oyunumuzda meydana yad əşyalar atıldığı üçün klubumuza və həmin tribunaya cəza verildi. O tribunada əyləşənlər arasında həyat yoldaşım və uşaqlarım da var idi. Növbəti ev oyununda yenidən bütün stadion dolu idi. ''Fənərbaxça''lılar hər yerdə qarşıma çıxır. Məni görən kimi təzahürat səsləndirirlər və çempionluq istədiklərini deyirlər. Bu mövsüm çempion olmaq məcburiyyətindəyik. AL-də isə pley-offa yüksələ biləcəyimizə inanırıq''.