''Fənərbaxça''nın sabiq baş məşqçisi Vitor Pereyranın çalışdırdığı Braziliya təmsilçisi ''Korintians''da böyük bir qalmaqal yaşanıb.

Komandanın ən məhşur üzvlərindən olan Villian özünün və ailəsinin ölümlə təhdid edilməsi üzündən ayrılmaq qərarına gəlib! Qeyd edək ki, Braziliya çempionatında lider ''Palmeyras''dan 6 xal geridə olmaqla 2-ci pillədə qərarlaşan ''Korintians'' Libertadores kubokunun 1/4 finalında ümidləri doğrulda bilmədi. Pereyranın kollektivi ''Flamenqo''ya həm evdə (0:2), həm də səfərdə (0:1) uduzaraq mübarizəni dayandırmalı oldu. Bu məğlubiyyətdən sonra fanatlar həm məşqçilər korpusuna, həm də oyunçuların böyük əksəriyyətinə etirazlarını bildirdilər. Komandanın ən çox qazanan oyunçularından olan Villian isə hətta ölüm təhdidləri almağa başladı. Ailə üzvləri də təhdid olununca, 34 yaşlı futbolçu klubdan ayrıldığını açıqladı: ''Korintians'' ilə vidalaşıram. Bu kluba mənə burda ikinci dəfə forma geymək şansı verdiyi üçün minnətdaram. Amma mənə və ailəmə qarşı olan ölüm hədə-qorxularından sonra ayrılmaq qərarına gəldim. İnanıram ki, hər iki tərəf üçün də faydalı bir addım olacaq. ''Korintians''a bundan sonrakı dönəmdə uğurlar arzulayıram''. Daha öncə ''Çelsi''dəki çıxışı ilə böyük populyarlıq qazanmış Villian 2021-dən ''Korintians''ın şərəfini qoruyurdu. ''Sambaçı''ya ''Fənərbaxça'' və ''Fulhem'' maraq göstərir.