Bu yay Linkoln Enrike, Armindo Bruma və Əmrə Moru transfer edən ''Fənərbaxça'' 4-cü keçidini bitirməyə yaxındı.

Football-plus.az xəbər verir ki, Türkiyə yığmasının yeni üzvü Tyaqo Çukur ''Fənər''lə danışıqlar üçün dünən İstanbula gəlib. Son detalların ardından gənc futbolçu tibbi müayinədən keçəcək və hər şey qaydasında getsə, rəsmi müqaviləyə imza atacaq. Türkiyə mətbuatının yazdığına inansaq, ''Fənər'' Tyaqonun müqavilə ilə məxsus olduğu ''Uotford''a 250 min avro təzminat ödəyəcək. Digər detallar isə hələ ki, bəlli deyil.

Tyaqo Çukur 2002-ci ildə Niderlandda doğulub. 4 il ''Feyenoord'' və 4 il ''Alkmaar''ın akademiyasında top qovan forvard keçən ilin yanvarında ''Uotford''a keçmişdi. Amma Tyaqo ötən mövsümü icarə əsasında ''Donkaster''də keçirmiş və 26 oyunda 1 qol, 2 məhsuldar ötürmə ilə yadda qalmışdı. Çukur gənc yaşına rəğmən fiziki göstəriciləri ilə diqqət çəkir. Onun boyu 196 sm-di. Türkiyə futbol ictimaiyyəti bu oyunçunu ötən ay tanıdı. Ştefan Kunts Millətlər Liqası matçları ərəfəsində onu ilk dəfə yığmaya dəvət etdi. Çukur Litva ilə matçın son 6 dəqiqəsində şans qazanaraq yığmada debüt etmişdi.