"Tərlan müəllim həmkarımızdı, fikirlərinə də hörmət edirəm. Komandada psixoloji vəziyyət ürəkaçan deyildi. İstədiyimiz kimi təlim-məşq toplanışı keçə bilmədik. Yetərincə yoldaşlıq oyununda gücümüzü sınamadıq. Büdcənin az olması üzündən istədiyimiz transferləri reallaşdırmaq mümkün olmadı. Nə şərait yaradılmışdısa, ona uyğun da iş ortaya qoyduq. Doğma meydanda oyunlarımızı keçirməyə icazə verilmədi, ardıcıl məğlubiyyətlər komandada əhval-ruhiyəni aşağı saldı. Amma komandanın fiziki cəhətdən zəif kimi qiymətləndirilməsi fikriylə qəti razılaşmıram. Mənim rəhbərliyim altında komanda 4 oyun keçirdi. Hər görüşdə də hücumlar təşkil edir, qollar vururduq. Müdafiədə oyunumuz alınmasa da, irəlidə pis çıxış etmirdik. Həmçinin “Kəpəz” 5-ci turda adlı-sanlı "Qarabağ"a qarşı itkilərlə çıxsa da, 90 dəqiqə yaxşı müdafiə olundu, komanda şəklində qapandılar, sadəcə, ani səhvdən qol buraxdı. Hələ ki güclü "Qarabağ"a ilk ciddi müqaviməti "Kəpəz" göstərib. ÇL-də Polşa, Macarıstan, İsveçrə çempionlarını darmadağın edən ağdamlılar "Kəpəz"i güclə 1:0 uddu. Sözümün canı odu ki, komanda meydana çıxıb qollar vurur, son çempiona qarşı ciddi müqavimət göstərirsə, necə demək olar ki, fiziki cəhətdən hazır deyil?”