Misli premyer-liqasında 6-cı tura start verilib.

"Kəpəz" "Turan Tovuz"a səfərdə məğlub olub - 0:2. Oyundan sonra Gəncə təmsilçisinin baş məşqçisi Tərlan Əhmədovun mətbuat konfransı keçirilib. Sizi mütəxəssisin fikirləri ilə tanış edirik:

"Komandanı götürəndə gördüm ki, nəsə etmək olar, potensial var. Üstünlük bizdə olsa da, məğlub olduq. Futbolda belə hadisələr var. Kaş ki, pis oynayıb qalib gələrdik. Komanda gələcəyə ümid verir. Görəcəyimiz işlər çoxdu. Hücum xəttində problem qabarıq şəkildə görünür. Çalışırdıq ki, rəqibi topsuz qoyaq və boşluqlar əldə edək. İkinci hissədə bunu bacardıq. Hər iki hissədə qol epizodlarımız var idi. Məyus olmaq, depressiyaya qapanmaq olmaz. Qarşıda 30 tur var".

- Raul Əliyevi yola saldız. Qış fasiləsinə kimi onu əvəz edəcək oyunçu tapa biləcəksiz?
- Bəli.

- Başqa mövqeləri də gücləndirəcəksiz?
- Ola bilər ki, bir hücumçu bir də hələ açıqlamaq istəmədiyim mövqeyə transfer edəcəyik. Başqa mövqe də ola bilər. Qışa qədər komandada yeni nəfəs olmalıdı. Hücumda aqressivlik yarada bilmirik. Rauf Əliyev məsələsinə qayıtmayacam. Nizam-intizam birinci novbədədi. Kimliyindən asılı olmayaraq.

- Tural Axundov bu gün ehtiyatda idi. Onun Rauf Əliyevin arxasınca göndəriləcəyi gözlənilir?
- Xeyr. Raufun arxasıyca heç kim getməyəcək. Tural təcrübəli futbolçudu. Bu gün onun ehtiyatda qalması o demək deyil ki, həmişə mənim yanımda oturacaq. Oyunu nəzərə alıb onu ehtiyatda saxladıq. Elçin Əlicanov yaxşı oyun nümayiş etdirdi. Kim güclü olacaqsa, o da meydanda olacaq.

- Müsahibənizdə bildirmişdiz ki, gəncəli azarkeşlər qısa zamanda qələbələr görəcək. Qısa zaman deyəndə nəyi nəzərdə tutursuz?
- 5 gün ərzində çalışdıq daha keyfiyyətli oyuna üstünlük verək. Amma hər halda düşünürdüm ki, bu oyunda bir xalımız var. Elə nüanslar var ki, açıqlaya bilmirsən. İki hakim Tovuzdandı. Əsas hakim və VAR hakimi tovuzludu. Belə oyunlarda çox diqqətli olmaz lazımdı. Derbi matçıdı. Təsəvvür edin ki, Almaniya və İtaliyanın oyununa əsli alman olan hakim təyin olunur. Qışa qədər bacardığımız qədər xal toplayacağıq. Qışda yeni futbolçular komandaya cəlb olunacaq. Gəncə futbolunun əvvəlki əzəmətini geri qaytarmaq lazımdı. Bu oyun mənə gələcək üçün ümid verdi.

- Çətin vəziyyətdə olan AZAL-da uğurlu işlər görmüsüz, "Keşlə"ni avrokuboka çıxarmısız. Bu gün "Kəpəz"də sizdən nə gözləmək olar?
- Həyatda heç nə sığortalanmayıb. Büdcəsi çox olan komanda da məni qovdu, az olan da. Söhbət sırf büdcədən getmir. Bəlkə də qismətim budu ki, çətin vəziyyətdə olan komandalarda işləyirəm. Yaxşı, hazır komandaya heç kim məni dəvət etmir. "Neftçi"də 18 futbolçu göndərib, 16 futbolçu cəlb elədim, komanda uğurlu çıxış etdi. Bu gün "Kəpəz"də ümidverici oyunçular çoxdu. Amma çatışmayan cəhətlər də var. Ona görə də yeni cəlb olunan futbolçular komandanı gücləndirməlidi. Qışdan sonra daha yaxşı futbol oynayacağıq.

- Bu gün "Kəpəz"in ən böyük problemi nədi? Taktiki, fiziki, hazırlıq, maliyyə, yoxsa başqa səbəblər?
- Demək olar ki, hamısı. Nəsə demək mənim üçün çətindi. Komandanın heç nəyi yoxdu. Futbolçular fiziki baxımdan hazırlıqsızdı. Birdən-birə də hazırlamaq olmur. Biz psixoloji durumu, özüməinamı qaytardıq. Hamımız bilirik ki, "Kəpəz"də maliyyə problemi var, evdə oynamırıq, baza, avtobus, inventar çatışmazlığı problemi var. O dəyəri qaytarmalıyıq ki, bu şəhərin komandasına daha çox sponsor olsun, yerli ictimaiyyət, veteranlar, xaricdə yaşayan gəncəlilər komandaya dəstək olmalıdı. Gəncə futbolu inkişaf etməsə, Azərbaycan futbolunda futbolçu çatışmazlığı olacaq. Yaxşı nəticə üçün hər şey yüksək səviyyədə olmalıdı.

- Necə edəcəksiz ki, Gəncə azarkeşi yenidən "Kəpəz"ə sahib çıxsın?
- Bunun üzərində iş gedir. İcra başçısı da bu işdə bizə dəstək olur. Yaxın günlərdə bu məsələ öz həllini tapacaq.