“Qarabağ” yoluna bu heyətlə davam edəcək? – AÇIQLAMA
Dünən Çempionlar Liqasının 2-ci təsnifat mərhələsi çərçivəsində "Qarabağ" səfərdə "Sürix"lə ağır oyun keçirsə də, sonda sevinən tərəf oldu.
Lakin "köhlən atlar"ın 2 aparıcı müdafiəçisi - Kevin Medina və Maksim Medvedev zədələndi, Kadi Borgeslə Riçard Almeyda isə cəzalı duruma düşdü. Dünənki nəticə ilə Ağdam təmsilçisi yalnız 3-cü mərhələyə yüksəlmədi, həm də Konfras Liqasının qrupunda yerini təmin etdi.
Görəsən, komanda heyətini gücləndirəcək? Ümumiyyətlə, buna ehtiyac var? "Football-plus.az" saytı olaraq bu suallara cavab tapmaq üçün tanınmış menecer Tural Əsgərova müraciət etdik:“Dünən çox gərgin oyun oldu. "Qarabağ" növbəti mərhələyə adladı. Təmsilçimizi təbrik edir, növbəti oyunlarda uğurlar arzu edirəm. "Qarabağ", təbii ki, transferlər etsə, lap yaxşı olar. Əminəm ki, Qurban müəllim və onun seleksiyaçıları daim axtarışdadı. Amma bir reallıq da var ki, çempionatımızım səviyyəsi aşağı olduğundan hər futbolçu ölkəmizə gəlmək istəmir. Yəni bu gün menecerlərimiz səviyyəli futbolçuları "Qarabağ"a təklif etsə, sözsüz ki, onu alacaqlar. Sadəcə, dediyim kimi, səviyyəli futbolçular üçün çempionatımız cəlbedici deyil. Düşünürəm ki, "köhlən atlar" transfersiz də keçinə bilər. Bir faktı xatırladım. Çempionlar Liqasının 2017/18 mövsümündə "Qarabağ" qrupda oynadı. Hətta bəzi qarşılaşmalarda əsas futbolçular, həmçinin Rəşad Sadıqov da zədəliydi. Hamı bir ağızdan deyirdi ki, komanda mütləq transferlər etməlidi. Halbuki Ağdam təmsilçisi həmin mövsümün yay “transfer pəncərəsi”ndə cəmi 2 futbolçunu - Jezniçakla Geryeni sıralarına qatmışdı. Yəni Qurban Qurbanov ÇL-in qrup mərhələsində əlindəki heyətlə kifayətləndi. Bu təcrübəyə əsaslanaraq deyə bilərik ki, "Qarabağ" hazırkı heyətlə avrokuboklarda mübarizəni davam etdirmək iqtidarındadı”.
ABDULLA İSMAYILOĞLU
Digər xəbərlər
