“Tıxaclar çox olsa da, İstanbulu sevirəm”
“Qalatasaray”ın bu yay ən hay-küylü transferlərindən olan Dris Mertens klubun rəsmi kanalına açıqlamalar verib.
"Football-plus.az" xəbər verir ki, “Napoli”də 9 mövsüm keçirdikdən və klub tarixinin ən məhsuldar oyunçusu olduqdan sonra Neapoldan ayrılan və İstanbula gələn 35 yaşlı belçikalı forvard hələ ki yeni klubunda 2 oyun keçirib və qol hesabını aça bilməyib. “Yuventus”dan təklif almışdızmı” sualına “başqa klublar haqda danışmağı xoşlamıram. “Qalatasaray”da olduğum üçün xoşbəxt və qürurluyam” cavabını verən məşhur futbolçu daha sonra bunları deyib: “Qalatasaray” Türkiyənin ən böyük klubudu və buranı seçməyimin əsas səbəbi budu. Amma uyğunlaşmaq üçün komanda ilə birlikdə mümkün qədər çox vaxt keçirməli, məşqlərə çıxmalıyam. Mənim yaşımda uyğunlaşma prosesi elə də asan keçmir. Bu həftə sabiq komanda yoldaşım Marek Hamşikin şərəfini qoruduğu “Trabzonspor”la qarşılaşacağıq. Marekin Türkiyədə xoşbəxt olduğunu bilirəm. Mən isə yeni gəmişəm. Bura uyğunlaşmağa, özümə ev tapmağa çalışıram. Biz diqqəti rəqibə yox, özümüzə yönəltməliyik. Oyunda mümkün qədər diri olmalı və Trabzonda özümüzü ən yaxşı tərəfdən göstərməliyik. Okan Burukla mənim meydandakı mövqeyim barədə söhbət etmişik. Hər iki cinahda, oyun qurucusu və mərkəz hücumçusu mövqelərində oynaya bilərəm. Rəqib qapısına nə qədər yaxın olsam, özümü bir o qədər rahat hiss edəcəm. Qol hesabımı açmaq istəyirəm. Qol vurandan sonra onu necə qeyd edəcəyimi özünüz görəcəksiz. İtaliya və Türkiyə çempionatları arasında səviyyə baxımından fərq olmasa da, taktika baxımından müəyyən fərqlər var. Türkiyədə daha kompakt oynamalısan. Rəqiblərin əks-hücumu zamanı diqqətli olmalısan. Komanda ötən mövsümü 13-cü pillədə bitirmişdi. Ona görə də bizdən dərhal lider olmağı gözləmək düzgün deyil. Sadəcə, hər həftə inkişaf etməyə və çempionluq yolunda irəliləməyə çalışacağıq. Səviyyəli, güclü və sürətli oyunçularımız var. Mən də təcrübəmi onlarla bölüşməyə, taktika və başqa məqamlar baxımından yardım etməyə çalışıram. İstanbulun mədəniyyəti və gözəlliyi xoşuma gəlir. Tıxaclar bir qədər çox olsa da, buranı sevirəm. Yoldaşımla birlikdə Türkiyə mətbəxini sevirik. Meneməni çox bəyəndik. Adi həyata artıq alışmışam. İndi qalıb ən çətin hissə - buranın futboluna alışmaq. 3 oyuna cəmi 2 qol vurmuşuq və bunun o qədər də yaxşı nəticə olmadığını bilirik. Amma digər tərəfdən 3 oyuna cəmi 1 qol buraxmışıq. Həm müdafiəyə, həm də hücuma önəm verməliyik. Yeni oyunçularımız çoxdu. Onların bir-birinə alışması vaxt aparır. Bu, uzunmüddətli bir prosesdi”.
Digər xəbərlər
