Bilindiyi kimi, ötən il 38 illik həsrətə son qoyaraq tarixinin 7-ci çempionluğunu qazanan “Trabzonspor” bu mövsüm Türkiyəni Çempionlar Liqasında təmsil edəcək.

“Fənərbaxça” artıq bu turnirdə mübarizəni dayandırdığından qardaş ölkənin yeganə ümidi Trabzon təmsilçisidi. Amma Abdulla Avcının komandası qrup mərhələsinə düşmək üçün əvvəlcə bir rəqibi keçməli olacaq. Həmin rəqibin adı artıq məlumdu. Söhbət ötən mövsüm tarixinin 14-cü çempionluğunu qazanmış Danimarka təmsilçisi “Kopenhagen”dən gedir. Tərəflər arasında ilk oyun avqustun 17-də “Parken”də, ikinci oyun isə 24-də “Medikal Park”da keçiriləcək.

Püşkün nəticəsi Danimarkada heç də xoş qarşılanmayıb. Ölkə mətbuatında “Trabzonspor” çətin rəqib kimi qeyd olunaraq maraqli başlıqlar atılıb. Məsələn, ölkənin öndə gələn “Ekstra Bladen” nəşri “arzulaya biləcəyimiz ən son rəqib” sərlövhəsi ilə “Trabzonspor”u oxucularına təqdim edib və bu komandada iki danimarkalı futbolçunun – Andreas Korneliusla Yens Strüger Larsenin olduğu xatırladılıb. “B.T.” nəşri püşkün nəticəsini “kabus” adlandırıbsa, TV2 kanalında “Trabzonspor” qorxulu bir rəqib kimi təqdim olunub. Bu arada püskatmadan sonra qaradənizlilərin prezidenti Ahmet Ağaoğlu bunları deyib: “Çempionlar Liqasında Türkiyə çempionu nə üçün təsnifat mərhələsində oynamalıdı? Bunu araşdırmaq lazımdı. Halbuki bəzi ölkələrdə hətta 3-cü yeri tutmuş komanda da birbaşa ÇL-in qrupunda oynayır. Ölkəmizdə futbol inkişaf etsəydi, biz indi pley-offda oynamaq məcburiyyətində qalmazdıq. Hələ Rusiya klubları olsaydı, biz hətta 3-cü təsnifat mərhələsindən başlamaq məcburiyyətində qalacaqdıq.

“Kopenhagen” mümkün rəqiblər arasında ən hazır durumda olanıdı. Məncə, “Kopenhagen” rəsmiləri də pley-offda oynamaq məcburiyyətində qalmalarından və bizə rəqib olmalarından narazıdılar. Keçmişdə onlara qarşı uğursuz bir oyunumuz olmuşdu. Onun qisasını almağa çalışacağıq. Qrupa vəsiqə qazanmaq və ÇL-in himnini ölkəmizdə səsləndirmək istəyirik. Bu həm “Trabzonspor”, həm də Türkiyə futbolu üçün çox önəmlidi”.

Qeyd edək ki, avqustun 2-də yaranışının 55 illiyini qeyd edən “Trabzonspor” tarixi ərzində yalnız bir dəfə – 2011/12 mövsümündə ÇL-in qrupunda oynayıb. Həmin vaxt çempion “Fənərbaxça”nın avrokuboklardan kənarlaşdırılması üzündən bu şansı yaxalayan komanda “İnter”, “Lill” və ÇSKA-nın yer aldığı qrupda 1 qələbə, 4 heç-heçə, 1 məğlubiyyətlə 7 xal toplamış və 3-cü yeri tutmuşdu. “Kopenhagen”in əsası 1992-ci ildə “Kopenhagen Boldklub” və “Bolklubben 1903” adlı klubların birləşməsindən sonra qoyulub. Maraqlıdı ki, “Kopenhagen”in sələfi sayılan “Boldklubben 1903” ilə “Trabzonspor”un yolu daha öncə kəsişib. Özü də bir yox, iki dəfə. Bu, trabzonlulara indiyə qədər rəqib olmuş yeganə Danimarka təmsilçisidi. İlk dəfə onların yolu 1977/78-də Çempionlar Kubokunun birinci mərhələsində kəsişib. Trabzondakı ilk oyunda meydan sahibləri minimal hesabla qalib gəlmişdilər. Amma cavab oyunu isveçli Rolf Erikssenin biabırçı idarəçiliyi ilə yadda qaldı. “Boldklubben 1903” 2 şübhəli qolla gəldi. Oyundan sonra fanatlar arasında ciddi münaqişə yaşandı və 8 türkiyəli azarkeş həbs olundu. Ağaoğlu da “qisas almalıyıq” açıqlaması ilə məhz həmin oyunu nəzərdə tutur. İkinci duel 1991/92-də UEFA kubokunun 3-cü mərhələsinə təsadüf etdi və yenə sevinən Danimarka təmsilçisi oldu. “Trabzonspor” səfərdəki ilk oyundan minimal hesablı məğlubiyyətlə ayrıldısa, Trabzondakı qarşılaşma 1:1-lik bərabərliklə yekunlaşdı. “Kopenhagen”in özünün isə indiyə qədər Türkiyə klubları ilə yolu üç dəfə kəsişib. Bu komanda 2013/14-də ÇL-də “Qalatasaray”la eyni qrupa düşmüş və evdə minimal qələbədən sonra İstanbulda 1:3 hesabı ilə uduzmuşdu. Bundan başqa, “Kopenhagen” 2019/20-də AL-in 1/8 finalında “İstanbul BŞ”ni mübarizədən kənarlaşdırmışdısa (evdə 3:0, səfərdə 0:1), ötən mövsüm Konfrans Liqasının pley-offunda “Sivasspor”u çox rahat şəkildə keçərək (evdə 5:0, səfərdə 2:1) qrup mərhələsinə vəsiqə əldə etmişdi. Onu da bildirək ki, “Trabzonspor” indiyə qədər ÇL-də təsnifatdan başladığı mövsümlərdə heç vaxt qrup mərhələsinə qədər irəliləyə bilməyib. Komanda bu turnirdə 2004/05-də 3-cü təsnifat mərhələsində Kiyev “Dinamo”suna (səfərdə 2:1, evdə 0:2), 2005/06-da 2-ci təsnifat mərhələsində “Anortosis”ə (səfərdə 1:3, evdə 1:0) və 2011/12-də 3-cü təsnifat mərhələsində “Benfika”ya (evdə 0:2, səfərdə 1:1) uduzub. Amma az öncə də qeyd etdiyimiz kimi 2011/12-də “Fənər”in ÇL-dən kənarlaşdırılması “Trabzonspor”un qrup mərhələsinə yolunu açmışdı.

ƏLİ