Sabah Çempionlar Liqasının pley-off mərhələsində "Qarabağ" "Viktoriya"nı (Plzen) qəbul edəcək.

Football-plus.az xəbər verir ki, bu gün görüşdən öncə keçirilən mətbuat konfransında Ağdam təmsilçisinin baş məşqçisi Qurban Qurbanov iştirak edib. 50 yaşlı mütəxəssis görüş haqda fikirlərini səsləndirdikdən sonra jurnalistlərin suallarını cavablandırdı:

- 6 il əvvəl də "Viktoriya" ilə qarşılaşmışdız. Bu müddətdə "Qarabağ" və Qurban Qurbanov nələrə nail olub?
- Bəli, bu komanda ilə oynamışıq və mərhələ adlayan tərəf onlar olmuşdu. Yaxşı xatırlayırıq, çox qol imkanlarımız olmuşdu. Amma onlar son dəqiqələdə imkan yaxalayaraq qol vurdular. Hər oyun mənim və komandam üçün böyük addımdı. İldən-ilə təcrübəmiz artır. Amma yenə də hamımız üçün çox azdı. Daha çox təcrübə toplamalıyıq. Böyük təcrübə də bu oyunlarda qazanılır. Çempionlar Liqasında gərginlik, həyəcan digərlərindən çox olur. Azarkeşlər də istəyirlər ki, komandamız qrupda yer alsın. Bu da məsuliyyətimizi artırır. Belədə həyəcan da artır. Əvvəlki illərə nisbətən daha soyuqqanlı davranırıq və təcrübəmiz hiss olunur.

- "Qarabağ" həm Polşa və Macarıstan azarkeşində Azərbaycan futboluna qarşı münasibəti dəyişib. Növbəti rəqib isə heç vaxt klublarını məğlub etmədiyimiz Çexiya klubudu. Bu sindromunu da qırmaq mümkün olacaqmı?
- Bu il gərgin oyunlarımız çox oldu. Polşa, İsveçrə və Macarıstan çempionları ilə qarşılaşdıq. Bizə həmişə yuxarıdan aşağı baxıblar fikrini demək istəmirəm. Amma futbol bu ölkələrdə bizim düşünmədiyimiz şəkildə inkişaf edir. Biz onlarla qarşılaşanda da ciddi çətinliklər çəkirik. Macarıstan bu ölkələrdən biridi. Bizim ümumi illik planlarımız var. Həmişə futbolçularıma arxayın olmuşam. Rəqib haqda tanışlıq verdikdə bunu diqqətlə, istəklə qarşılayırlar. Futbolçularımla birlikdə daha bərk, möhkəm olub, xarakter göstərərək, yaxşı oynayacağımıza inanıram. Təəssüf ki, rəqib də belə düşünür. Bəlkə fərqli oyun göstərdilər. Futbolçuların oyunun gedişində düzgün düşünməsi, hiss etməsi qalibiyyətimiz üçün üstünlük olacaq. Bunu etsələr, qələbə əldə edə biləcəyik. Rəqib 5-6 futbolçu ilə sürətli hücuma çıxır və standart vəziyyətlərdən bacarıqlıdı. Son 6 oyunda fərqləndikləri 15 qolun 7-ni standart vəziyyətlərdən vurublar. Çalışacağıq ki, meydanın bizə aid hissəsində az olsunlar.

- Havanın isti olmasını bizim üçün üstünlük saymaq olar?
- Bakının istisi mənim üçün həmişə xoş olub, digər ölkələrin havasından fərqlənib. İsti havada məşq prosesi keçmək əlavə enerji alır. Eyni məşqi sərin havada keçirdiyimiz zaman digərindən çox faydalı olur. Məşqin sürəti, keyfiyyəti fərqlənir. Belə olduqda futbol daha yaxşı inkişaf edir. Avropa futbolunun üstünlüklərindən biri də onun iqlimidi. Onlar çox az müddətdə isti havada hazırlaşırlar. Bizdə isə isti havada istədiyin sürət olmur. Bu da hər bir futbolçu üçün geriyə addım deməkdi. Digər komandalar daha hazırlıqlı gəlirlər, nəinki biz. İstədikləri yükləməni futbolçulara verə bilirlər, amma biz bunu əldə edə bilmirik. İsti havada hazırlıq olmayan futbolçu üçün daha təsirli olur. Bu barədə müəyyən addımlar atırıq, məşqləri tez saatlara salmağa çalışırıq. Bakının istisindən xoşum gəlir. Bizə əlavə güc verən azarkeşlərimiz var. Onların dəstəyi ilə yorğunluğumuz çıxır.

- İlk oyunun Bakıda keçirilməsinin hansı üstünlüyü ola bilər?
- Son vaxtlar ev-səfər amili yoxdu. Futbolçuların təcrübələri artıb. Üstünlük odur ki, öz meydanında oynadığın zaman azarkeşlər səni dəstəkləyir. İlk oyunun üstünlüyü odu ki, rəqibi daha yaxından tanıyırsan. Son vaxtlar ilk görüşün harada keçirilməsinə önəm vermirik. Çünki istənilən halda hər iki görüşdə rəqibə qarşı hazırlaşmalısan. Bu mövsümkü nəticələr də göstərir ki, birinci görüşün Bakıda olması bizim üçün faydalı olub. Yalnız xırda detallarda fərqlidi.

- Biletlərlə bağlı azarkeşləri müəyyən narazılığı var. Onların könlünü necə almağı düşünürsünüz?
- Azərbaycanda futbola maraq artıb. Bu maraq sevindiricidi. Azərbaycanda azarkeşlər var, bizdə futbolu sevirlər. Sadəcə, onları küsdürmək olmaz. Bizim əlimizə futbolumuzu inkişaf etdirmək üçün şans düşübsə, bundan maksimum istifadə etməliyik. İşimizi elə qurmalıyıq ki, azarkeşlərin futbola sevgisi davam etsin. Bu epizodlara görə onları ancaq alqışlayıram. Özümün də komandamın adından təşəkkür edirəm. Mən narazılıq deməzdim, ürəkdən gələn bir şeydi. Çox istərdim ki, onların hamısı stadionda olsun. 30 min azarkeş stadionda baxırsa, digərləri restoranlarda, monitorlarda, evlərində baxırlar. İnşallah, gələcəkdə çempionatımız yaxşı səviyyəyə gəlib çıxar və daxili çempionatlarımızda da azarkeşlərimiz olsun. Klub tərəfindən hər hansı bir çatışmazlıq olubsa, üzürlü saysınlar. İmkanım olsa, bütün futbolçuları meydana buraxardım. Hamısı çox yaxşı hazırlaşır. Eləcə də 30 mindən artıq azarkeşin oyuna gələ bilməməsinə üzülürəm. Futbolumuzun sevilməsi inkişafı üçün təkan olacaq.

- Son 6 oyunda 14 qol vursanız da, müdafiə xətti narahatlıq doğurur. Qapıçı Şahruddin Məhəmmədəliyev də daxil olmaqla burda stabillik çatmır. Qarşıda isə qrup mərhələsi gəlir. Müdafiənin gücləndirilməsi ilə bağlı nə düşünürsüz? Bu müdafiə xətti ilə nəhəng klublara qarşı nəyə ümid edə bilərik?
- Biz az qol buraxaq, amma çox qol vurub qalib gələk. Futbolda belədi ki, çox hücumda olursansa, müdafiəndə boşluqlar yaranır. Bu gün Avropada çox nadir hallarda qolsuz oyun olur. İstənilən rəqib cüzi boşluqdan istifadə edə bilir. Son vaxtlar sərgilədiyimiz oyunun bu qollarda bəlkə rolu böyükdü. Çox qapanmaq istəmirik. Oyunu rəqib meydanında qurmağa çalışırıq. Əsas vacib olan stabil nəticədi. Mən müdafiə xəttindən razıyam. Texniki səhvlər ola bilər. Məni narahat edən də hər bir xətdə olan texniki səhvlərdi. Bu da qaçılmazdı. Amma oyunçularımın rəqibdən çəkinməməsi məni sevindirir. Müdafiəçilərim daha çox təkbətək mübarizədə olurlar. Çalışırıq ki, onlar nə sürətdə, nə də təkbətək mübarizədə uduzsunlar. Hamı istəyərsiz ki, komanda daha yaxşı müdafiə olunsun. Amma mən komandamdan razıyam. Yeni müdafiəçi götürmək fikrim yoxdu. Zədəlilərimiz də sıraya dönəcək. Çempionlar Liqasının qrupunda oynamaq onların haqqıdı. Milli üzvlərimizin titullu komandalara qarşı oynaması yığmamız üçün də faydalıdı. Onların indi kənarda qalmaq yox, inkişaf etmək vaxtdı. Məsələn, Bəhlul Mustafazadənin artıq Avropa təcrübəsi var. Bəli, bəzən qurban veririk. Amma bunu onlara görə edirik.

- Hər kəs Çempionlar Liqasının qrupuna vəsiqə gözləyir. Bu amil futbolçularda psixoloji təzyiq yaradır?
- Hamı arzu, dua edir ki, qrupa düşək. Bu mənə və futbolçulara böyük məsuliyyət verir. Məncə, qrupdan oynamağımızı gözləmirlər, arzu edirlər. Bu da bizi yaxşı mənada həyəcanlı edir. İnanıram ki, sevinmək üçün hamımız bir yerdə hər şeyi edəcəyik.