DÇ-2022-nin açılış oyununun vaxtı dəyişdirilib. Qərarı FİFA Şurası verib.
Ali futbol qurumunun saytının yaydığı məlumata görə, bu il Qətərdə təşkil ediləcək turnirin açılışı noyabrın 21-dən 20-nə irəli çəkilib. Qətər yığması bazar günü yerli vaxtla saat 19.00-da (Bakı vaxtı ilə 20.00-da) Ekvadorla oynayacaq. Daha əvvəl isə bu oyunun noyabrın 21-də keçirilməsi nəzərdə tutulmuşdu. FİFA-nın rəsmi məlumatında yerdəyişmə ilə bağlı belə bildirilib:
“FİFA Şurasının bürosu yekdilliklə Qətər və Ekvador yığmaları arasındakı matçın noyabrın 20-də təşkilinə qərar verib. Bu qərar rəqabətin və nəticələrin qiymətləndirilməsindən, əsas maraqlı tərəflər və təşkilatçı ölkənin müvafiq qurumları ilə məsləhətləşmələrdən və razılıqdan sonra verilib. Bunda əsas məqsəd dünya çempionatının açılış matçında ev sahibi və ya sonuncu çempionun iştirak etməsi ilə bağlı uzun illər mövcud olan ənənənin davam etdirilməsidi. Bilet sahibləri elektron poçtları vasitəsilə məlumatlandırılacaqlar. Onların biletləri açılış tarixinin dəyişməsinə baxmayaraq, qüvvədə qalacaq”.
Beləliklə, DÇ-2022-in final mərhələsi noyabrın 20-dən dekabrın 18-dək keçiriləcək.