Məhşur ''Frans Futbol'' nəşri 2022-ci il üçün ''Qızıl top''u qazanmağa namizəd olan 30 futbolçunun adını açıqlayıb.

"Football-plus.az" xəbər verir ki, siyahıda ÇL-in və Avropa superkubokunun son qalibi ''Real''in, ÇL-in son finalçısı ''Liverpul''un, eləcə də premyer-liqanın çempionu ''Mançester Siti''nin 6 futbolçusu yer alıb. ''Real''ı Kərim Benzema, Tibo Kurtua, Vinisius, Kazemiro, Luka Modriç, Antonio Rüdiger, ''Liverpul'' u Məhəmməd Salah, Trent Aleksander-Arnold, Luis Dias, Fabinyo, Darvin Nunyes, Vircil van Diyk, '' Mançester Siti''ni isə Kevin de Bruyne, Fil Foden, Bernardo Silva, Riyad Mahrez, Joao Kanselo və Erlinq Holann təmsil edir. Digər 12 futbolçu isə bunlardı: Rafael Leao, Coşua Kimmix, Kristofer Nkunku, Robert Levandovski, Son Hın Min, Mayk Menyan, Harri Keyn, Sadio Mane, Sebastyan Halle, Kriştiano Ronaldo, Duşan Vlahoviç, Kilian Mbappe.

Siyahıda ən böyük sürpriz orda əfsanəvi Lionel Messinin adının olmamasıdı! Argentinalı superulduz 2005-ci ildən bu yana ilk dəfə ''Qızıl top''a namizədlərin siyahısına düşməyib. Xatırladaq ki, Leo bu nüfuzlu mükafatı rekord sayda – 7 dəfə qazanıb və üstəlik son qalib də məhz odu. ''Qızıl top''un tarixində cəmi 3-cü dəfə mükafatı qazanan futbolçu növbəti il namizədlər arasına düşə bilməyib. Buna qədər bu hadisə 1993-cü ildə Marko van Bastenin və 2019-cu ildə Luka Modriçin başına gəlmişdi. 35 yaşlı Messinin PSJ ilə çempion olduğu halda siyahıya düşə bilməməsi, 37 yaşlı Kriştiano Ronaldonun isə ''Mançester Yunayted''lə 6-cı pilləni tutmasına rəğmən namizədlər arasına düşməsi futbol dünyasında və sosial şəbəkələrdə böyük müzakirələrə səbəb olub.