Təxminən 2 ayyarımlıq fasilədən sonra premyer-liqada bu gün mövsümə start veriləcək.

31-ci ölkə çempionatının əsas özəlliyi odu ki, uzun fasilədən sonra elitada 10 komandanın iştirakına şahidlik edəcəyik. “Turan Tovuz”un 9, “Kəpəz”in isə 4 ildən sonra yüksək dəstəyə dönməklə premyer-liqanın futbol xəritəsini qərbə doğru genişləndirdi. Onu da qeyd etmək lazımdı ki, yay fasiləsində bəzi klublarda baş məşqçi dəyişikliyi yaşanıb. “Səbail”də Aftandil Hacıyevin yerinə Mahmud Qurbanov “sükan arxasına” dəvət olunubsa, “Neftçi” də Samir Abasovu Laurentsiu Regekampf, diviziondan elitaya yüksələn “Turan Tovuz”da Əfqan Talıbovu Ayxan Abbasov əvəzləyib. “Şamaxı”da isə sənəd üzərində baş məşqçi kimi Vüqar Əsgərlinin adı yazılsa da, texniki zonada əsas söz sahibi Cavid Hüseynov olacaq. Yeri gəlmişkən, dünən “Ferentsvaroş”la taleyüklü oyuna çıxan “Qarabağ”ın baş məşqçisi Qurban Qurbanov anket-sorğuya qatılmadı. Onun komandası onsuz da Çempionlar Liqası kimi mötəbər turnirdə 5-ci oyununu keçirməklə nəyə qadir olduğunu ortaya qoyub. Ardıcıl olaraq Polşa və İsveçrə çempionlarını mübarizədən kənarlaşdıran “köhlən atlar”ın transferləri, hazırlıq səviyyəsi göz önündədi. Ağdamlıların 2022/23 mövsümündə də çempionluğa oynayacağı heç kimdə şübhə doğurmur.

Fasilə dönəmi necə yadda qaldı, klublar təlim-məşq toplanışlarından necə yararlandı? Təbii ki, bu suallara çempionatın ilk turlarında cavab tapa biləcəyik. Ancaq çoxillik ənənəmizə sadiq qalıb, start ərəfəsində elita təmsilçilərinin baş məşqçilərinə 4 sual ünvanladıq.

1. Təlim-məşq toplanışından razı qaldız?
2. İstədiyiniz transferləri reallaşdıra bildiz?
3. Komanda çempionata neçə faiz hazırdı?
4. Kollektivin qarşısına hansı hədəf qoyulub ?

“Şamaxı”nın çalışdırıcısı Vüqar Əsgərlinin mövzu ilə bağlı fikirləri belə oldu:

1. Məlum səbəblərdən komanda bir az gec yığıldı. Hazırlıq baxımından istərdik ki, vaxtımız daha uzun olsun. Amma qısa müddət olsa da, intensiv məşqlərlə çalışdıq ki, bu problemi aradan qaldıraq. Komandanı tam komplektləşdirə bilməsək də, ümid edirəm ki, “transfer pəncərəsi” bağlanana qədər istədiyimiz heyəti formalaşdıracağıq.

2. Komandanın heyəti, bildiyiniz kimi, yalnız yerlilərdən qurulub. “Transfer pəncərəsi”nin bağlanmasına qədər yenilər ola bilər. Tanınmış yerli futbolçulardan Elvin Məmmədov, Amil Yunanov, Rəşad Əzizli, Kamal Mirzəyev var ki, onların gənclərin inkişafına təcrübələri ilə töhfə verəcəyinə əminəm.

3. Artıq təlim-məşq toplanışını yekunlaşdırmışıq. 3 gündü "Neftçi" ilə oyunun hazırlığına start vermişik. Mövsümün ilk qarşılaşmaları ağır olur. Deməzdim ki, komandam çempionata 100 faiz hazırdı. Amma oyundan-oyuna “artıraraq” tam istədiyimiz formaya düşəcəyimizə inanıram.

4. Rəhbərliklə bir yerdə uzunmüddətli planımız var. Məqsəd əsasən gənclərdən ibarət yaxşı komanda formalaşdırmaqdı. Rəhbərliklə müzakirələrdən sonra belə qərara gəldik ki, gənc və yerli futbolçulardan dinamik komanda hazırlansın. Həm yerli, həm də xarici liqalarda bu modeldən istifadəni görmüşük və yetərincə perspektiv vəd edən modeldi.