Təxminən 2 ayyarımlıq fasilədən sonra premyer-liqada bu gün mövsümə start veriləcək.

31-ci ölkə çempionatının əsas özəlliyi odu ki, uzun fasilədən sonra elitada 10 komandanın iştirakına şahidlik edəcəyik. “Turan Tovuz”un 9, “Kəpəz”in isə 4 ildən sonra yüksək dəstəyə dönməklə premyer-liqanın futbol xəritəsini qərbə doğru genişləndirdi. Onu da qeyd etmək lazımdı ki, yay fasiləsində bəzi klublarda baş məşqçi dəyişikliyi yaşanıb. “Səbail”də Aftandil Hacıyevin yerinə Mahmud Qurbanov “sükan arxasına” dəvət olunubsa, “Neftçi” də Samir Abasovu Laurentsiu Regekampf, diviziondan elitaya yüksələn “Turan Tovuz”da Əfqan Talıbovu Ayxan Abbasov əvəzləyib. “Şamaxı”da isə sənəd üzərində baş məşqçi kimi Vüqar Əsgərlinin adı yazılsa da, texniki zonada əsas söz sahibi Cavid Hüseynov olacaq. Yeri gəlmişkən, dünən “Ferentsvaroş”la taleyüklü oyuna çıxan “Qarabağ”ın baş məşqçisi Qurban Qurbanov anket-sorğuya qatılmadı. Onun komandası onsuz da Çempionlar Liqası kimi mötəbər turnirdə 5-ci oyununu keçirməklə nəyə qadir olduğunu ortaya qoyub. Ardıcıl olaraq Polşa və İsveçrə çempionlarını mübarizədən kənarlaşdıran “köhlən atlar”ın transferləri, hazırlıq səviyyəsi göz önündədi. Ağdamlıların 2022/23 mövsümündə də çempionluğa oynayacağı heç kimdə şübhə doğurmur.

Fasilə dönəmi necə yadda qaldı, klublar təlim-məşq toplanışlarından necə yararlandı? Təbii ki, bu suallara çempionatın ilk turlarında cavab tapa biləcəyik. Ancaq çoxillik ənənəmizə sadiq qalıb, start ərəfəsində elita təmsilçilərinin baş məşqçilərinə 4 sual ünvanladıq.

1. Təlim-məşq toplanışından razı qaldız?
2. İstədiyiniz transferləri reallaşdıra bildiz?
3. Komanda çempionata neçə faiz hazırdı?
4. Kollektivin qarşısına hansı hədəf qoyulub ?

“Sumqayıt” ın çalışdırıcısı Aleksey Baqanın mövzu ilə bağlı fikirləri belə oldu:

1. Təlim-məşq toplanışından razı qaldım. Türkiyədə olduğumuz müddətdə yaradılan şəraitdən, futbolçuların məşqlərə yanaşmasından şikayətlənmək günah olar. Yoxlama görüşlərində qarşılaşdığımız rəqiblər də ürəyimcə oldu. Bir sözlə, keyfiyyətli hazırlıq prosesi keçdik.

2. Müqavilə bağladığımız bütün futbolçular komanda ilə birgədi və ilk oyuna hazırlaşırlar. Bəzi mövqelər var ki, güclənməsinə ehtiyac var. Bu yöndə işlər davam edir və Allah qoysa, yaxın günlərdə həmin mövqelər üçün nəzərdə tutduğumuz transferləri reallaşdıracağıq. Transferlərdən razı qaldığımı söyləyə bilərəm. Çox iş görmüşük, daha artığını düşünürük.

3. İlk oyunlardan sonra çempionata necə hazırlaşdığımızı görəcəyik. Mövsümün əvvəlində çox çətin təqvimlə üz-üzəyik. Həkimlərin mənə verdiyi göstəricilərdən və özüm gördüklərimdən belə qənaətə gəlmək olar ki, komandanın psixoloji və funksional hazırlığı yerindədi. Faiz etibarı ilə deyə bilmərəm, ancaq hazırlığımız yüksək səviyyədədi.

4. Kimlərisə qorxutmamaq üçün yüksək hədəflər barədə danışmaq istəməzdim. Ən yaxşısı susmaqdı. İnkişaf etmək, yuxarı qalxmaq üçün hər oyunda maksimum nəticə əldə etmək lazımdı. Bu gün avrokubok oyunlarında stadionların tam dolduğunu görürük. “Sumqayıt”ın əksər oyunçuları artıq iki dəfə bu həyəcanı yaşayıb. Dolu tribunalar, mükəmməl ab-hava – düşünürəm ki, bu nüanslar yaxşı mənada narkotik kimi futbolçularımıza təsir göstərəcək. İstərdim ki, gələn yay biz də Avropa klublarını Sumqayıta gətirək.