Təxminən 2 ayyarımlıq fasilədən sonra premyer-liqada bu gün mövsümə start veriləcək.

31-ci ölkə çempionatının əsas özəlliyi odu ki, uzun fasilədən sonra elitada 10 komandanın iştirakına şahidlik edəcəyik. “Turan Tovuz”un 9, “Kəpəz”in isə 4 ildən sonra yüksək dəstəyə dönməklə premyer-liqanın futbol xəritəsini qərbə doğru genişləndirdi. Onu da qeyd etmək lazımdı ki, yay fasiləsində bəzi klublarda baş məşqçi dəyişikliyi yaşanıb.

“Səbail”də Aftandil Hacıyevin yerinə Mahmud Qurbanov “sükan arxasına” dəvət olunubsa, “Neftçi” də Samir Abasovu Laurentsiu Regekampf, diviziondan elitaya yüksələn “Turan Tovuz”da Əfqan Talıbovu Ayxan Abbasov əvəzləyib. “Şamaxı”da isə sənəd üzərində baş məşqçi kimi Vüqar Əsgərlinin adı yazılsa da, texniki zonada əsas söz sahibi Cavid Hüseynov olacaq. Yeri gəlmişkən, dünən “Ferentsvaroş”la taleyüklü oyuna çıxan “Qarabağ”ın baş məşqçisi Qurban Qurbanov anket-sorğuya qatılmadı. Onun komandası onsuz da Çempionlar Liqası kimi mötəbər turnirdə 5-ci oyununu keçirməklə nəyə qadir olduğunu ortaya qoyub. Ardıcıl olaraq Polşa və İsveçrə çempionlarını mübarizədən kənarlaşdıran “köhlən atlar”ın transferləri, hazırlıq səviyyəsi göz önündədi. Ağdamlıların 2022/23 mövsümündə də çempionluğa oynayacağı heç kimdə şübhə doğurmur.

Fasilə dönəmi necə yadda qaldı, klublar təlim-məşq toplanışlarından necə yararlandı? Təbii ki, bu suallara çempionatın ilk turlarında cavab tapa biləcəyik. Ancaq çoxillik ənənəmizə sadiq qalıb, start ərəfəsində elita təmsilçilərinin baş məşqçilərinə 4 sual ünvanladıq.

1. Təlim-məşq toplanışından razı qaldız?

2. İstədiyiniz transferləri reallaşdıra bildiz?

3. Komanda çempionata neçə faiz hazırdı?

4. Kollektivin qarşısına hansı hədəf qoyulub ?

“Kəpəz”in çalışdırıcısı Yaşar Vahabzadənin mövzu ilə bağlı fikirləri belə oldu:

1. Bildiyiniz kimi, toplanışın ilk mərhələsini Gəncədə keçirdik. Sonra 16-17 gün Bakıda, daha dəqiq desəm, “Dalğa Arena”da hazırlıq oldu. Bakıda olduğumuz müddətdə üç yoxlama görüşündə qüvvəmizi sınadıq. Ondan sonra xaricə üz tutmağı planlaşdırsaq da, müəyyən səbəblərdən alınmadı. Çox istərdim ki, güclü komandalarla daha 2 sınaq matçı keçirək. Təəssüf ki, istəyimizi reallaşdıra bilmədik. Son toplanış üçün yenidən Gəncəyə üz tutduq və gündə bir məşqlə kifayətləndik.

2. Mövsümlərarası fasilədə heyətə büdcəmizə uyğun futbolçular dəvət etdik. Aşağı-yuxarı yeni oyunçular bizi qane edir. Ancaq elə mövqelər var ki, ora yeni oyunçu istəyirik. “Transfer pəncərəsi” bağlanana qədər bu yöndə çalışmalar davam edəcək.

3. Komandanın çempionata neçə faiz hazır olduğunu söyləmək bir qədər çətindi. Daha çox yoxlama oyunu keçirsəydik, bu barədə nəsə söyləmək olardı. Çalışacağıq çempionatda mübariz komanda kimi tanınaq.

4. Dörd ildən sonra elitaya dönən komandanın məqsədi nə olar?! Kollektiv yeni formalaşır. Premyer-liqada yerimizi möhkəmləndirmək əsas məqsəd olacaq.