Bu yay “Çelsi” ilə “Barselona” arasında yeni futbolçular uğrunda amansız mübarizə gedir – düzdü, hələ ki bütün oyunçular İspaniyanı seçir.

Əvəzində Frenki de Yonq London istiqamətində hərəkət edə bilər. Hərçənd niderlandlı Kataloniya paytaxtını tərk etməyə tələsmir. Aşağıda bu məsələ ilə bağlı bütün məqamlara toxunmuşuq.

• “Diario Sport”a inansaq, “Çelsi” “Barselona”nı De Yonqun transferi ilə bağlı təklif göndərəcəyindən xəbərdar edib. İyulun əvvəlində londonluların həmsahibi Todd Boeli Barselonada Xuan Laporta ilə axşam yeməyinə oturub. Boeli həmin görüşdə deyib ki, “Çelsi” onu razı salan məbləğ təklif olunacağı halda Aspilikueta ilə Alonsonu buraxacaq. Laporta da öz növbəsində De Yonqla danışıqlara razılıq verib.

• Elə həmin nəşr əlavə edir ki, niderlandlı yenə də “Barselona”dan getməkdən boyun qaçırır. Hər şey klubun futbolçuya əməkhaqqı və bonuslar üzrə 20 milyon avro borclu olması ilə bağlıdı. Niderlandlı ilə 14 milyon avro maaş nəzərdə tutan müqavilə bağlasa da, koronavirusa görə ardıcıl iki il kluba güzəşt edib. Danışıq belə olub ki, kataloniyalılar bu pulu tədricən qaytaracaq. Ancaq insayder xəbərlərinə inansaq, pul hələ də qaytarılmayıb, halbuki məsələni futbolçu klubdan ayrılana qədər həll etmək lazımdı. Futbolçu başqa klubların təklifini dinləməyə hazırdı, ancaq borc problemi həll olunandan sonra.

Ancaq bu yöndə suallar var. “The Times”a inansaq, klub istəyir ki, De Yonq borcun 20 milyon avrodan 7 milyona endirilməsinə razılıq versin. AS isə yazır ki, Xavi De Yonqa izah edib – futbolçu qalmaq istəyirsə, maaşının iki dəfə azaldılmasına razılıq verməlidi.

Bir başqa mənbəyə - “The Independent”ə inansaq, belə münasibət Frenkinin xətrinə dəyər: o, indi nə borc, nə də əməkhaqqı məsələsində güzəşt etmək niyyətindədi. Qari Nevill niderlandlını məhkəməyə müraciət etməyə çağırıb, Niderland Futbolçularının Həmkarlar İttifaqının prezidenti Yevgeni Levçenko isə klubu soyğunçuluq taktikasına əl atmaqda suçlayıb. Laportanın Neviilə cavabı ilə yuxarıdakı müsahibədə tanış ola bilərsiz. “Barsa”nın prezidenti Levçenkonu da cavabsız qoymayıb: “Nə Frenkini, nə də bir başqasını soymuşuq. Bu adamın fikrinə hörmətlə yanaşıram, ancaq iki tərəf arasındakı danışıqlar soyğunçuluq adlanırsa, düşünürəm ki, Levçenko səhv edir”.

Beynəlxalq Peşəkar Futbolçular Asosiasiyasındakı qaynaqlar isə hadisələrin axarını izlədiklərini təsdiqləyiblər.

• “Mançester Yunayted” də yayboyu Frenkinin arxasınca qaçır. “Diario Sport” yazır ki, klub De Yonqun transferini necə çox istəyirsə, “Barsa”nın ona olan borcunu qapatmağa da hazırdı. İngilislər son təklifi göndərməyə hazırlaşır – bu təklif niderlandlını komandanın ən yüksək ödənişli futbolçusuna çevirəcək.

Əldə dəqiq rəqəmlər olmasa da, MY-nin maaş təklifinin “Barsa”nın növbəti iki mövsümdə futbolçuya ödəyəcəyi pulun təkrarı olduğu bildirilir. “Marca” bir müddət əvvəl yazırdı ki, De Yonq qalarsa, kataloniyalılar qalan 4 mövsüm üçün ona maaş və bonuslar şəklində 88,58 milyon avro ödəyəcək. Elə qarşıdakı mövsüm üçün 21 milyon, 2023/24 mövsümü üçün isə 27,7 milyon avro ödənilməlidi.

• Ancaq niderlandlı idman prinsiplərinə görə “Yunayted”i istəmir – klub bu yay Çempionlar Liqasında oynamayacaq, Ten Haq hələ ki yeni layihənin planlarını cızmaqdadı.

Bu mənada “Çelsi” De Yonqu daha çox cəlb edir. Bu başqa məsələ ki, londonlular “Yunayted” səviyyəsində sərfəli maliyyə şərtləri irəli sürə bilmir. Onu da unutmayaq ki, hələ “Barselona”ya da pul ödəmək lazımdı. Kataloniyalılar ən azı 80 milyon avro istəyir ki, MY ilə bu məbləğ artıq razılaşdırılıb da.
Hərçənd “Barselona” ictimaiyyət önündə hələ ki satış variantını təqdiqləmir. Laporta ya özünü qəsdən belə aparır, ya da real şəkildə niderlandlının yenidən maaşının azalmasına razılıq verəcəyinə inanır: “Onun qalması üçün mümkün olan hər şeyi edirik və oyunçunun da eyni davranışına ümid edirik. Kluba gələrkən üzə çıxardıq ki, maaş fondu 40 faiz şişirdilib. Bizdə əməkhaqqını yeni şkalası müəyyənləşib və bütün futbolçuların qazancı ona uyğunlaşmalıdı”.

...Hər şeydən belə görünür ki, Frenki çətin yerindən tərpənə. Ən azı “Barsa” köhnə borcu ödəyənə qədər.