“Yunayted”in son təklifi 65 milyon avro + 22 milyon bonusdan ibarətdi
Frenki de Yonqun “Barselona”dan “Mançester Yunayted”ə keçidi ilə bağlı “dastan” davam edir. İnsayder Fabritsio Romanoya inansaq, hazırda klublar bonusların müzakirəsi mərhələsindədi. MY sövdələşməni mümkün qədər tez bitirməyə çalışsa da, artıq pul ödəmək istəmir, çünki satıcının iqtisadi durumundan xəbərdardı. Məsələ təkcə onda deyil ki, “Barsa” böhrandan çıxmaq üçün oyunçularını satmalıdı. “Marca” bu mövzuda bəzi başqa maraqlı detallar da üzə çıxarıb.
Belə bir versiya var ki, De Yonqun keçidini “Barselona”nın onun qarşısındakı borcları əngəlləyir. Niderlandlı illik 14 milyon avro maaş nəzərdə tutan müqavilə imzalasa da, ardıcıl iki il kluba güzəşt etdi: postpandemiya dövründəki mövsümdə maaşının 11 milyona salınmasına, ötən il də ən azı 5 milyon avro endirimə razılıq verdi. Danışıq belə olmuşdu ki, kataloniyalılar bu pulu ona tədricən qaytaracaq, amma son xəbərlərə inansaq, qaytarmayıb. İndi isə futbolçu ayrılana qədər məsələni həll etmək lazımdı. Müqavilədə olan başqa bir bəndə görə isə futbolçu mövsümboyu keçirilən oyunların 60 faizində iştirak edəcəyi halda əlavə 2 milyon avro da almalıydı. İki mövsüm oynadığını nəzərə alanda burda da 4 milyon avro borc yaranır.
MY ilə “Barsa” anlaşıb, futbolçu getmək istəmir
Beləliklə, MY ilə “Barselona” arasında danışıqlar davam edir.
• İnsayder Jerar Romero yazır ki, “Yunayted”in son təklifi 65 milyon avro + 22 milyon bonusdan ibarətdi. Onun yazdığına görə, ümumi məbləğ İspaniya klubunu qane edir, sadəcə, bu məbləğin bir qədər fərqli bölünməsini istəyir. Yəni Mançester klubu 75 milyon avronu indi ödəsin, bonus kimi 12 milyon qalsın. Təklif bu şəkildə yenilənərsə, “Barsa” dərhal keçidə razılıq verəcək.
• Daha bir insayder Şey Luqassi yazır ki, Frenki Erik ten Haq naminə MY-yə keçməyə hazırdı, ancaq Avropa Liqasında oynamaq perspektivi onu qətiyyən razı salmır. Niderlandlı artıq transfer olunmağa razılıq verib, sadəcə, İspaniyada qalmaq istəyir. Luqassinin dediyinə görə, klubda De Yonqun satılmasına qaçılmaz addım kimi baxırlar.
• Fabritsio Romano əlavə edir: “Barsa”nın münasibəti Frenkinin xoşuna gəlməyib, o daha maaşın azaldılmasına razı deyil. Oyunçu qalmağı çox istəyir, ancaq önəmli maliyyə iktisinə göz yummayacaq. Eyni zamanda Ten Haq De Yonqla daimi təmasdadı, onlar mümkün gələcəyi müzakirə edirlər.
• Jerar Romero əlavə edir ki, niderlandlı uğrunda mübarizəyə “Çelsi” də qoşulub – bu məqam MY-nin Frenkini dilə tutmasına mane ola bilər.
Romano “Barsa”ya inanmamağı məsləhət görür
Daha bir maraqlı məqam var: “Barselona” hələ ki Frenkinin satışı ilə bağlı variantı inkar edir. Klub prezoidenti Xuan Laporta hər müsahibəsində vurğulayır ki, De Yonq komandada qalır, yalnız hansısa qeyri-adi hadisə halında gedə bilər: “Frenki dünyanın ən yaxşı yarımmüdafiəçilərindən biridi. Və o, bizim oyunçudu. Onun xidmətində maraqlı olanlar, almaq istəyənlər var. Ancaq biz onu satmaq niyyətində deyilik – Frenki özü də qalmaq istəyir. Bəli, əməkhaqqı ilə bağlı problem var. Bu problemi həll etmək lazımdı, ancaq biz Frenkini saxlamaq istəyirik. Onunla bağlı təkliflər var, sadəcə, indi onlara baxmağın yeri deyil. Frenkini satmaq marağımız yoxdu”.
Fabritsio Romano da açıq-aşkar deyir ki, Laportaya inanmağa dəyməz və MY ilə danışıqlar tam sürətlə gedir.