Argentina çempionatının son turunda futbol meydanlarında nadir hallarda görünən bir hadisə baş verib.

Football-plus.az xəbər verir ki, 11-ci tur çərçivəsində ''Qodoy Kruz'' ''Veles Sarsfild''i qəbul edib və görüş 1:1 hesabı ilə yekunlaşıb. İkinci hissənin gedişində yaşanan bir epizodda meydan sahiblərinin forvardı Maksimo Perrone yan xəttin yaxınlığında rəqibindən sıyrılmaq istəyərkən kobduluqla üzləşdi.

Ona qarşı kobud oynayan isə ''Veles Sarsfild''in baş məşqçisi Alexander Medina oldu! Uruqvaylı mütəxəssis qəribə şəkildə oyun epizoduna müdaxilə edərək rəqibi dayandırdı. Perrone isə yerə yıxıldıqdan sonra kiçik bir şok yaşayaraq nə baş verdiyini anlamağa çalışdı. Bu qəribə epizod Medinaya baha başa gəldi və hakim təbii ki, kobudluğa görə yox, oyuna müdaxilə etdiyinə görə dərhal ona qırmızı vərəqə göstərdi.