“Formula-1” komandalarından “Red Bull”un sürücüsü Serxio Peres bildirib ki, növbəti dörd yarışdakı nəticələr vacib olacaq. Meksikalı sürücü mövsümə inamlı başlasa da, son 4 yarışda iki dəfə mübarizəni dayandıraraq, şansını çətinləşdirib. Mövsümün bitməsinə 10 mərhələ qalmış o, komanda yoldaşı Ferstappendən 70 xal geridədi: “Növbədə daha çox yarış var. Son yarışda ən yaxşı performansımı göstərə bilmədim, amma dördüncü oldum. Son yarışlarda mübarizəni dayandırmaq daha pis idi. Bunlar çempionatdakı vəziyyəti çətinə saldı. Ümid edirəm ki, Macarıstanda problem yaşamaram. Boliddə özümü rahat hiss edirəm. Növbəti dörd yarış mübarizənin taleyi baxımından vacib olacaq”.
Hazırda əsas rəqibi Şarl Lekleri 63 xal qabaqlayan Maks Ferstappen də danışıb: “Mən hər yarışdan maksimumu almağa çalışıram. Həmişə vəziyyətimizi təhlil etməli və nəyin mümkün olduğunu görməliyik. Birincilik mümkündüsə, bunun üçün mübarizə apararıq. Ancaq ikinci və ya üçüncü yer ən yüksək nəticədisə, onda bunu əldə etməyə çalışarıq. Çempionluq uğrunda mübarizə aparırıqsa, hər yarışda finiş görməliyik. Ən vacibi budu”.
“Aston Martin”in sürücüsü Sebastyan Fettel isə ilin sonunda avtoidmandan gedəcək. O öz yerinə namizəd kimi Mik Şumaheri görür: “Öz fikrim var və Miki yüksək səviyyədə görürəm. Düzü, obyektiv düşünmürəm, amma ona yaxınam və düşünürəm ki, əla pilotdu. O həm də yaxşı şagirddi və həmişə yeni şeylər öyrənir. Lazımi xüsusiyyətləri var. Eyni zamanda gənc və təcrübəsizdi. Qərarı mən verməyəcəm. Məndən soruşdular və fikrimi dedim. Son qərarı komanda verəcək”.