Peres müqavilə müddətini uzatdı, Horner onu təriflədi
“Red Bull” pilotu Serxio Pereslə müqavilənin müddətini uzatdığını elan edib.
32 yaşlı meksikalı ilə yeni müqavilə 2024-cü ilin sonuna qədərdi. 2021-ci ildən “Red Bull”un şərəfini qoruyan Peres cari mövsümün ilk 7 mərhələsindən sonra 110 xalla şəxsi hesabda üçüncüdü. Monakoda finişə birinci çatan meksikalı “Red Bull” karyerasında 2-ci, “Formula-1”də 3-cü qələbəsini qazandı.
“Red Bull”un rəhbəri Kristian Horner Peresin müqaviləsini yeniləməsinə belə reaksiya verib: “Çeko komandaya gəldiyi gündən bəri işini fantastik səviyyədə yerinə yetirir. O təkcə möhtəşəm komanda oyunçusu deyil, həm də hər kəsin hesablaşmalı olduğu əsl gücdü. Karlos bu il irəliyə doğru daha bir addım atıb. Maks Ferstappendən geriliyi də aradan qaldırıb. Onun tempini, bacarığını və təcrübəsini nəzərə alsaq, bizim üçün bu qərarı vermək çətin deyildi. Çeko komandamızda çıxışını davam etdirəcəyinə görə sevinirik”.
Horner Ferstappenlə Peresin çempionluğuna da eyni dərəcədə sevinəcəyini bildirib: “İki pilotdan hansının çempion olacağı bizim üçün vacib deyil. Əlbəttə, Mühəndislər kubokunun önəmi böyükdü. Maks da, Çeko da “Red Bull” pilotudu, ikisi də eyni dərəcədə şans qazanır. Mövsüm hələ çox-çox uzundu, irəlidə yüksəlişlər də olacaq, enişlər də. Hər iki pilotun zirvə uğrunda mübarizə aparması möhtəşəmdi. Ancaq pilotlarımızın qarşılıqlı əlaqə şəklində çalışması komanda üçün vacibdi. Ona görə ki, “Ferrari”nin maşınları çox sürətlidi. Nə olur-olsun, “Ferrari” təhlükəli rəqibdi. Onu arxada qoymaq üçün birgə çalışmalıyıq”.
Xatırladaq ki, hazırda şəxsi hesabda 125 xalla Maks Ferstappen liderlik edir. 3-cü yerdə qərarlaşan Peres ondan 15 xal geri qalır. Mühəndislər kubokunda isə “Red Bull” 235 xalla zirvədədi. Bildiyiniz kimi, mövsümün növbəti yarışı iyunun 10-12-də Azərbaycan paytaxtında keçiriləcək.
Bu arada “Red Bull” pilotu Maks Ferstappen komanda ilə müqaviləsinin sonuna qədər burda qalmaq niyyətində olduğunu bildirib: “Komanda dəyişməyi planlaşdırmıram. Mən komandadan razıyam, komanda da məndən. Ancaq 2028-dən sonra hansı işlə məşğul olacağıma hələ qərar verməmişəm. Karyeramı bitirə də bilərəm. 17 yaşımdan “Formula-1” yarışlarında çıxış edirəm, artıq burda çox mövsüm keçirmişəm. 31 yaşımda necə olacağımı bilmirəm, formamın zirvəsinə qalxacam, yoxsa eniş başlayacaq. Bu üzdən hələ qərar verməmişəm”.
Digər xəbərlər
