Ölkəmizi Çempionlar Liqasında təmsil edən “Qarabağ” son oyununu Bakıda “Sürix”ə qarşı keçirdi. Ağdamlılar 2-ci təsnifat mərhələsinin ilk görüşündə İsveçrə təmsilçisinə 3:2 hesabı ilə qalib gəldi. Birinci mərhələdə Polşa “Lex”i ilə qarşılaşan “köhlən atlar” iki oyunun nəticəsinə görə rəqibini 5:1 üstələdi.
Maraqlıdı, “Qarabağ”ın heyətində aldığı sarı vərəqələrin sayına görə cəzalı duruma düşüb “Sürix”lə vacib cavab oyununu buraxan futbolçu var? Bunu aydınlaşdırmaq üçün Ağdam təmsilçisinin Çempionlar Liqasında keçirdiyi görüşlərin protokoluna göz gəzdirdik. Son 3 matçda ümumilikdə 6 futbolçu sarı vərəqə alıb. Riçard Almeyda “Lex”lə hər iki qarşılaşmada cəzalandığı üçün “Sürix”lə cavab matçında daha ehtiyatlı oynamalıdı. Əks halda, 3-cü sarı vərəqə ilə növbəti görüşdə iştirak edə bilməyəcək. Almeyda ilə eyni durumda olan futbolçulardan biri də Kadi Borgesdi. Son 2 oyunda 2 dəfə cəzalanan yarımmüdafiəçi növbəti “sarı” ilə, “Qarabağ” 3-cü təsnifat mərhələsinə adlayacağı təqdirdə, komandasına kömək edə bilməyəcək. “Köhlən atlar”ın passivində 1 sarı vərəqəsi olan futbolçuları isə Patrik Andrade, Kevin Medina, Emin Cəfərquliyev və Ramil Şeydayevdi.
ŞAİR ABDULLA