"Araz-Naxçıvan”ın və futzal millimizin üzvləri Xətai Bağırovla İsa Atayevin karyerasını ölkə xaricində, daha dəqiq desək, Belçikada davam etdirəcək. Hər iki futzalçı “Futsal Beşiktaş Gent”lə “1+1” il şərti ilə müqavilə bağlayıb. Çempionlar Liqasında iştirak edəcək təmsilçimiz həmçinin növbəti transferini reallaşdırıb. Oktay Rüstəmli heyətə cəlb olunub. Fərqli illərdə “Araz-Naxçıvan”ın formasını geyən hücumçu son mövsümdə “Neftçi” İK-də çıxış edib və ölkə kubokunun qalibi olub. 28 yaşlı futzalçı ilə anlaşma mövsümün sonuna qədərdi. Klub buna qədər Rövşən Hüseynli, Xəzər Ağalızadə, Cavad Məmmədov, həmçinin braziliyalı Mateus Katatau, Varqas Amenqual Andreu, Vitao və Viktor Uqo Piresa ilə müqavilə bağlayıb. Karyerasını başa vuran Rizvan Fərzəliyev, müqaviləsinin müddəti başa çatan Murilo Borges, Dmitri Bondarev və Maneka ilə yollar ayrılıb.
Yığmanın da şərəfini qoruyan futzalçıların ölkə xaricinə üz tutması, legioner həyatı yaşamaq istəməsi alqışalayiqdi. Ancaq onu da nəzərə almaq lazımdı ki, həm Xətai, həm də İsa “Araz-Naxçıvan”ın aparıcı üzvlərindən sayılırdı. O klubun ki, yeni mövsümdə qarşısına Çempionlar Liqasının “dördlər finalı”nda oynamaq məqsədi qoyub. Bunu qəzetimizə açıqlamasında Naxçıvan təmsilçisinin vitse-prezidenti Mahmud Sadıqov söyləmişdi. Gprəsən, qarşısına ciddi hədəf qoyan klub aparıcı futzalçılarını niyə belə asanlıqla buraxır? Bu suala cavab tapmaq üçün Mahmud bəylə əlaqə saxladıq: “Xətai və İsa bu günlərdə mənə yaxınlaşıb Belçikadan təklif aldıqlarını dedilər. Məsələ ilə bağlı klubun prezidenti Zaur Axundovla görüşdüm. Zaur müəllim hər ikisinin Avropaya yollanmasında problem olmadığını söylədi. Onu da bildirim ki, həm Bağırovun, həm də Atayevin “Araz-Naxçıvan”la müqaviləsinin müddəti başa çatıb. Bizdə yeni anlaşmalar avqustun 1-də imzalanır. Hər ikisi azad agent olduğundan Belçika klubu “Araz-Naxçıvan”a təzminat ödəməyəcək. Bildiyim qədər “Futsal Beşiktaş Gent”in prezidenti türk iş adamıdı. Futzalçılarımız həm komandada oynayacaq, həm də onun şirkətində çalışacaq. Hər iki futzalçı ailələri ilə birgə Belçikaya yollanacaq”.
Vitse-prezident komandanın hazırlıq planını da açıqladı: “Bu günə kimi 3 braziliyalı - Mateus Katatau, Vitao və Viktor Uqo Piresa ilə ortaq məxrəcə gəlmişik. Böyük ehtimalla yaxın günlərdə daha bir braziliyalı ilə müqavilə bağlanacaq. Baş məşqçi Joze Alesio Da Silva hazırda vətənində istirahətdədi. O və yeni legionerlər avqustun 7-də Bakıda olacaq. Bir gün sonra isə komanda tibbi müayinədən keçərək məşqlərə başlayacaq. Təlim-məşq toplanışının ilk mərhələsi Bakıda reallaşacaq. Ola bilər ki, komanda hazırlığın növbəti mərhələsi üçün10 günlük bölgələrdən birinə yollandı”.
RƏŞAD