Afrikada 2022-ci ilin ən yaxşı futbolçusu seçilib. Sorğunun nəticəsi heç kimdə şübhə doğurmayıb.
Afrika Futbol Konfederasiyası (AFK) əvvəlcə bu ada namizədlərin son siyahısını açıqlayıb. Yekun siyahıya Məhəmməd Salah (“Liverpul”, Misir), Eduar Mendi (“Çelsi”, Seneqal) və Sadio Mane (“Liverpul”/“Bavariya”, Seneqal) layiq bilinib. Qalib AFK-nın texniki komitəsinin üzvləri, jurnalistlər, milli komandaların baş məşqçiləri və kapitanlarının səsverməsi ilə müəyyənləşib. Mükafatlandırma mərasimi iyulun 21-də Mərakeşin Rabat şəhərində keçirilib. “Bavariya”nın yeni transferi Mane daha çox səs toplamaqla qitədə ilin ən yaxşı futbolçusu adına layiq görülüb. Seneqallı oyunçu ötən mövsüm “Liverpul”un heyətində İngiltərə kubokunu və Liqa kubokunu qazanıb, Seneqal yığması ilə bu ilin ilk iki ayında keçirilən Afrika Millətlər Kubokunun qalibi olub. Yeri gəlmişkən, Sadio 2019-cu ildə də Afrikanın ən yaxşı futbolçusu seçilmişdi.
Rabatdakı mərasimdə bu ilin ən yaxşı komandası da müəyyənləşib. Bu ad uğrunda mübarizə Burkina Faso, Misir, Kamerun, Mərakeş və Seneqal yığmaları arasında gedib. Qalib isə sonuncu qitə çempionu Seneqal olub.