Dünən saytımızda “Qarabağ”ın Çempionlar Liqasındakı rəqibi “Sürix”in yeni mövsümə faciəvi şəkildə başladığını xəbər vermişdik.

Bəli, Franko Fodanın komandası “Yanq Boyz”la səfər oyununda darmadağın oldu – 0:4. Son mövsümü “Sürix”dən 16 xal geridə bitirən Bern təmsilçisinin bu gözlənilməz qələbəsinə ətraflı toxunmağa dəyər. Özü də maraqlıdı ki, son yarımsaatda vuruldu. Hərçənd hesabı 55-ci dəqiqədə qonaqlar açmalıydı. Sadəcə, penalti nöqtəsinə yaxınlaşan Antonio Markezano topu qapının üstündən vurdu.

Oyunda ilk real qol vəziyyətini “Sürix” yaratdı. İrəlidə Vilfrid Qnonto ilə birgə oynayan Ayequn Tosinin zərbəsini qapıçı David fon Ballmoos dəf edə bildi. Tosin hissənin sonuna 6 dəqiqə qalmış qapının bir neçə metrliyində dəqiq zərbə endirə bilmədi. Bundan bir dəqiqə əvvəl isə Markezano iti bucaq altından zərbə ilə qapı torunu yandan silkələdi. Amma ilk yarının ümumilikdə “Yanq Boyz”un üstünlüyü şəraitində keçdiyini qeyd etməliyik. Sadəcə, bu komandanın yaratdığı təhlükəli vəziyyətlərin saytımızın oxucusu üçün maraqlı olmadığını düşünürük.

“Sürix” 2-ci hissəyə də fəal başladı. Bəlkə də bütün oyunun həlledici anı 52-ci dəqiqəyə təsadüf etdi. Bledian Krasnikinin zərbəsindən sonra top meydan sahiblərinin müdafiəçisi Vinsent Syerronun əlinə dəydi. VAR-ın yardımına müraciət edən referi Sandro Şerer penalti nöqtəsini göstərdi ki, onun da boşa verildiyini bir qədər əvvəl xatırlatdıq. 62-ci dəqiqədə Fassnaht “Yanq Boyz”u irəli çıxardı. Qalan qollar son 13 dəqiqədə vuruldu. İtten 77-ci dəqiqədə fərqi artırdı, Rider (83) və Kanqa (85) isə darmadağını rəsmiləşdirdi.
Foda mövsümlərarası dövrdə heyətə qatdığı 4 futbolçudan üçünü bu oyunda meydana buraxdı. Şeyk Konde start heyətində idi, Conatan Okita və İvan Santini isə 2-ci hissədə oyuna qoşuldu. Beləliklə, startda darmadağın olan “Sürix” bu gün suzu süzülə-süzülə Bakıya gəlir...

“Sürix”in bu oyundakı heyəti ilə də tanış olun: Yanik Breher, Lindrit Kamberi, Adrian Gerrero, Fidan Aliti (Conatan Okita, 72), Bledian Krasniki (Fabian Roner, 72), Antonio Markezano (Ştefan Sayler, 84), Ayequn Tosin, Şeyk Konde (Mark Hornşuh, 72), Nikola Boraniyaşeviç, Vilfrid Qnonto (İvan Santini, 84), Mirlind Krezyu.

ORXAN