Rüstəm Rəhimov: “İndi belə çıxır, Qara Qarayevi dostu irəli çəkib?” - AÇIQLAMA
SSRİ futbolunda məşhur hakim Nikolay Latışevin köməkçisi kimi tanınan Sergey Belyayev "Sport-Ekspress" qəzetinin son saylarının birində dünyaca məşhur azərbaycanlı hakimlər Tofiq Bəhramovla Eldar Əzimzadə haqda diqqətimizi çəkən fikirlər söyləyib.
90 yaşlı veteran hakimin sözlərinə görə, hakimlərimiz qitəmiqyaslı yarışlara savad-bacarıqlarıyla yox, Latışevin lobbiçiliyi sayəsində təyinat alıblar. O həmçinin qeyd edib ki, Bəhramovla Əzimzadə laysmanlıqda olduqca zəif olmaqla yanaşı, karyeralarını uzatmaq üçün yaşlarını azaldıblar.
"Football-plus.az" saytı olaraq Belyayevin söylədiklərinə veteran hakim Rüstəm Rəhimovun reaksiyasını öyrəndik:
“Sergey Belyayevin özünə sual verən lazımdı ki, həmin dövrdə qanunsuzluq, özbaşınalıq, “lipa” halları olubsa, niyə üzərindən 40-50 il keçəndən sonra dilə gəlib? Bəli, Nikolay Latışevin Tofiq Bəhramov və Eldar Əzimzadə kimi referilərimizlə yoldaşlığı, dostluğu olub. Amma bu o demək deyil ki, onları irəli çəkən Latışev idi. Bu məntiqlə yanaşsaq, Qara Qarayevlə Dmitri Şestakoviç də çox yaxın dost olublar. İndi belə çıxır, Qara Qarayevin heç bir savadı, musiqi istedadı olmayıb və onu dostu irəli çəkib? Latışev SSRİ Hakimlər Komitəsinin sədri olmaqla yanaşı, FİFA-nın SSRİ üzrə nümayəndəsi idi. O, 1966-cı il dünya çempionatının finalını da idarə edib. Düşünün, Latışev kimlərisə layiq olmadığı halda irəli çəksəydi, dünya futbolunda, hakimlikdə nüfuzu, hörməti olardı? Rusiyalı mütəxəsis tək referi yox, insan kimi də həyatda olduqca ədalətli biri idi. Tofiq Bəhramov, Eldar Əzimzadə və başqa hakimlərimiz savadları, bacarıqları, zəhmətləri sayəsində irəli gediblər. Elə buna görə də bir qrup rus şovinistliklərindən dolayı onlara paxıllıq ediblər. Görünür, Sergey Belyayev də onlardandı. Rus xalqı heç də axmaq şovinistlər yox, həm də obyektivliyi, dürüstlüyü, yoldaşlığı bacaranlarla da zəngindi. Alimov, Jixorov, Butenko, Kazakov, Nepatov və adını çəkmədiyin onlarla rus hakimlər var ki, Tofiq Bəhramovla Eldar Əzimzadəyə yüksək dəyər veriblər, ehtiram göstəriblər. Odu ki, Belyayev 90 yaşında ağzına gələni çərənləməklə əslində dünyaca məşhur hakimlərimizə yox, Nikolay Latışevin şəxsiyyətinə, ruhuna hörmətsizlik edib”.
ABDULLA İSMAYILOĞLU
