''Fənərbaxça''da iki aydan çoxdu əsas komandadan kənarlaşdırılan və fərdi məşq etmək məcburiyyətində qalan Məsut Özil son günlər yenidən gündəmdədi.

"Football-plus.az" xəbər verir ki, dünyaca ünlü futbolçu özünün ''M10'' və ''39 Steps Cofee'' kimi şəxsi brendlərini genişləndirmək üçün İndoneziyaya səfər edib.

Çərşənbə günündən bu ölkədə olan 33 yaşlı futbolçu əvvəlcə İndoneziyanın turizm və iqtisadiyyat naziri Sandiaqo Uno ilə onun iqamətgahında görüş keçirib. Məsut cümə axşamı Türkiyənin İndoneziyadakı səfiri Aşkın Asanla görüşüb. Asan ona ziyarətinə görə təşəkkür edibsə, Məsut da öz növbəsində səfirə ''Fənərbaxça''nın 10 nömrəli formasını bağışlayıb və səfirlikdəki şərəf dəftərinə öz imzasını atıb.

Ünlü futbolçu daha sonra ölkənin idman naziri Zaynudin Amali ilə bir araya gəlib. Dünən isə Özil İndoneziya prezidenti Coko Vidodo ilə birlikdə cümə namazında iştirak edib. Təcrübəli futbolçunun bu layihə üçün İndoneziyanı seçməsi təəccüblü deyil. Çünki bütün dünyada onun ən böyük fanat kütləsi məhz bu ölkədədi. Anlaşmaların detalları dəqiq məlum olmasa da, Türkiyə mətbuatının yazdığına inansaq, Özil İndoneziyada imzaladığı ticari və sponsorluq müqavilələrindən təxminən 100 milyon dollar qazanacaq! Məsutun bu addımının həm də iki ölkə arasında əlaqələri gücləndirəcəyi gözlənilir. Eyni zamanda İndoneziyanın Turizm Nazirliyi ölkə turizmini beynəlxalq arenada tanıtması üçün də Özil ilə anlaşma əldə edib.

Qeyd edək ki, Məsut geyim markası olan ''M10'' brendini 2020-ci ildə hazırlayıb. Bu markaya aid ayaqqabılar, köynəklər, gödəkçələrin qiyməti təxminən 50-100 avrodu. Bundan sonra paytaxt Cakartada ''M10'' markasının mallarını hazırlayan xüsusi fabrik fəaliyyət göstərəcək. Məsut bu fabrikin işçiləri ilə görüşərək xatirə şəkli çəkdirdikdən sonra Cakartada yerləşən ''Gelora Bung Karno'' stadionunda gənc yerli oyunçularla görüşüb. Türkiyəli həmkarlarımızın diqqətini Məsutun bu görüşdə verdiyi açıqlama cəlb edib. Yeniyetmə futbolçulardan biri ondan bir gün İndoneziyada oynamaq istəyib-istəmədiyini soruşub. Məsut isə bunları deyib: ''Fənərbaxça'' ilə müqaviləm davam edir. Hazırda Türkiyədə xoşbəxtəm. Çünki ailəm də ordadı. Amma bir gün İndoneziyada oynamaq variantı yaransa, ''Bali Yunayted'' ilə maraqlana bilərəm''. 2015-ci ildə yaradılan bu klub son İndoneziya çempionudu.

Bundan başqa, Özil İndoneziyada olan ''İstiqlal Məscidi'' haqda daha çox məlumat toplamaq istədiyini deyərək gələcəkdə ailəsi ilə birlikdə Bali adasına tətilə gələcəyini də istisna etməyib.