Özil futboldan ayrıldıqdan sonra nə edəcək?
''Fənərbaxça''da baş məşqçi dəyişikliyinə baxmayaraq Məsut Özil hələ də əsas komandadan kənardadı və fərdi məşq edir.
Bu durum artıq 3 aydan çoxdu davam edir. Məsut bir müddət öncə ''Fənər''dən ayrılmayacağını bildirmişdi. Meneceri Ərkut Söğüt də tez-tez açıqlamalar verərək vəziyyətin yaxşılığa doğru dəyişəcəyini deyir. Söğüt bu dəfə İngiltərə mətbuatına açıqlamalar verib:
''Məsutu bundan sonra başqa klubun formasında görəcəyimizi düşünmürəm. Planları yalnız ''Fənərbaxça'' ilə bağlıdı və klubla hələ ikiillik müqaviləsi var. Çıxılmaz vəziyyətə düşsə və ayrılmalı olsa, yeni klub axtarmaqdansa, karyerasını bitirməyə üstünlük verəcək. Özilin futbolla vidalaşdıqdan sonra kibersport dünyasına baş vuracağını düşünürəm. Bəlkə də bu işlə peşəkar səviyyədə məşğul olacaq. İndidən öz komandası və oyunçuları var. ''Fortnite'' oyununda çox güclüdü. Bir gün yarışlarda iştirak etsə, təəccüblənmərəm. Bundan başqa həm mənim, həm də bir çoxlarının gözündə Məsut əsil qəhrəmandı. Çünki açıq sözlüdü və başqalarının dilə gətirməyə çəkindiyi mövzular haqda danışır. Uyğur türkləri üçün olan paylaşımını xatırlamaq kifayətdi. Onu futbolun Məhəmməd Əlisi də adlandırmaq olar. Məsut uyğurlara dəstək verəndə ''Arsenal'' klub olaraq siyasətə qarışmadığını açıqlamışdı. Amma qəribədi ki, indi az qala dünyadakı hər mövzuya münasibət bildirirlər. Ümumi götürəndə Məsut ''Arsenal''da keçirdiyi dönəmə görə peşman deyil. Klubu həqiqətən sevirdi. Sadəcə sonluq istədiyi kimi alınmadı. Amma bunu bir çox futbolçu yaşayır. Məsələn, Obameyanq da sonda ''Arsenal''dan ayrılmaq məcburiyyətində qaldı''.
Digər xəbərlər
