İyulun 20-də Çempionlar Liqasının 2-ci təsnifat mərhələsi çərçivəsində Kiyev ''Dinamo''suna qarşı keçirəcəyi vacib oyuna hazırlaşan ''Fənərbaxça'' dünən Avstriyaya yollandı.

İstanbul nəhəngi iyulun 7-nə qədər Qrats şəhəri yaxınlığındakı Bad Radskerburq bölgəsində toplanış keçəcək. Komanda burda iki hazırlıq oyunu keçirəcək. İlk görüş artıq bu gün Serbiya təmsilçisi ''Partizan''a qarşı olacaq. İkinci qarşılaşma iyulun 6-da Macarıstan təmsilçisi ''Fehervar'' ilə olacaq. ''Fənər''in vətənə qayıtdıqdan sonra keçirəcəyi növbəti yoxlama oyununun tarixi də məlumdu. ''Sarı-lacivərdlilər'' iyulun 10-da Sakaryada Acun Ilıcalının sahibi olduğu çempionşip təmsilçisi ''Hall Siti'' ilə üz-üzə gələcək. Baş məşqçi Jorje Jezuşun hücum xətti ilə bağlı son qərarını məhz Avstriya toplanışından sonra verəcək. ''Fənər'' İndiyə qədər heyəti 3 oyunçu ilə gücləndirsə də, mərkəz hücumçusunun transfer edilməməsi fanatlar arasında narahatlıq doğurur.

Bu arada 9 futbolçunun Avstriya toplanışından kənar qalması diqqəti çəkib. Onlardan ikisi - Ozan Tufanla Məsut Özil zatən uzun müddətdi əsas komandadan ayrıdı. Ozan ''Hall Siti''yə keçməyin biraddımlığındadısa, Özildən rəhbərlik canını qurtarmağa çalışır. Deyilənə görə, bu futbolçunun yeni mövsüm üçün lisenziyası çıxarılmayacaq! Ayrılmaq istəməyən Məsutun nə vaxta qədər fərdi məşq edəcəyi və gələcəyinin necə olacağı bilinmir. Yerdə qalan 7 futbolçudan ikisi – Sərdar Əziz və Migel Krespo zədə üzündən toplanışa aparılmayıb. Digər 5 futbolçu – Stiven Koker, Maurisio Lemos, Marsel Tisseran, Maks Mayer və Luis Qustavo, çox güman, özünə yeni klub axtarmalı olacaq. Jezuş ciddi problemləri olmadığı halda onları toplanışa aparmamaqla bu futbolçuların yeni mövsüm üçün onun planlarına daxil olmadığını göstərib. Onların arasında xüsusilə Qustavonun olması diqqəti çəkir. Təcrübəli braziliyalının klubla hələ birillik müqaviləsi var. 2019-da 6 milyon avroya ''Marsel''dən transfer edilən 34 yaşlı yarımmüdafiəçi klubda ümumilikdə 97 rəsmi oyuna çıxaraq 5 qol, 3 məhsuldar ötürmə ilə yadda qalıb. Bu 5 futbolçudan hələ ki yalnız Tisserana rəsmi təklif gəlib. Ona İtaliyadan 3 milyon avroluq təklif var. Bundan başqa, toplanışa aparılmasına baxmayaraq, Jezuşun Enner Valensiya ilə Mbvana Samattanın performansından da narazı qaldığı bildirilir. Sərfəli təklif gələcəyi təqdirdə bu oyunçuların satılacağı istisna edilmir. Avstriya toplanışı onların özlərini göstərə bilməsi üçün son fürsət olacaq.